Në Spanjë, pas ndeshjes së kthimit të gjysmëfinales së Champions League mes Arsenal dhe Atletico Madrid, e përfunduar me fitoren 1-0 të “Gunners” që u kualifikuan për finalen, ka shpërthyer polemika për një penallti të paakorduar për “Colchoneros” në fillimin e pjesës së dytë, për një faull mjaft të qartë të mbrojtësit Calafiori ndaj Griezmann. Pika e debatit është se arbitri Daniel Siebert kishte parë një faull të mëparshëm të Pubill ndaj Gabriel dhe për këtë arsye kishte dhënë një goditje dënimi për Arsenal.
Si qendron situata e pse nuk ndërhyri VAR
Në atë rast, VAR-i – që ishte gjithashtu gjerman, Bastian Dankert – nuk ndërhyri. Sipas shumëkujt, nuk do ta kishte bërë sepse ishte i pamundur ndërhyrja, duke qenë se Siebert kishte fishkëllyer faullin e Pubill përpara kontaktit të dytë Calafiori-Griezmann, duke ndalur lojën dhe duke e bërë të pavlefshme dhe të parevizueshme çdo gjë që kishte ndodhur më pas. Por duke rishikuar videon e aksionit dhe sidomos duke dëgjuar audion, dëgjohet qartë se arbitri fishkëllen vetëm pas shkeljes së Calafiorit ndaj Griezmann, duke treguar me vendosmëri se kishte ndëshkuar kontaktin e pak mëparshëm mes Pubill dhe Gabriel dhe pra nuk ishte penallti.
Kjo do të thoshte se, nëse do të ishte e nevojshme, VAR-i në atë moment mund të kishte ndërhyrë, pasi loja kishte vazhduar. Por nuk e bëri, duke vlerësuar se faulli i sinjalizuar ndaj Pubill (mjaft i diskutueshëm, për të thënë të drejtën) nuk hynte në kategorinë e “gabimit të qartë dhe të dukshëm” që sipas protokollit justifikon thirrjen e arbitrit për rishikim në fushë.
Opinioni i ish-arbitrit spanjoll Iturralde Gonzalez
Një vendim ky i fundit i gjykuar i diskutueshëm nga ish-arbitri spanjoll Iturralde Gonzalez: “Pika kyçe është nëse ai ka fishkëllyer faullin më parë. Por nëse nuk e ka bërë, është një vendim i VAR-it. VAR-i mund ta kishte njoftuar, kështu edhe ai do të mund ta shihte faullin”. Sepse sipas ish-gjyqtarit nuk kishte pasur asnjë faull të mëparshëm: “Nëse Pubill do ta kishte goditur, këmba e Gabriel do të ishte lëvizur, por mbrojtësi thjesht e tërhoqi këmbën për të shmangur penalltinë”.
Sa i përket Diego Simeone, pas ndeshjes ai zgjodhi të mos i ngrinte tonet dhe të mos i hiqte meritat Arsenalit për kualifikimin, duke lënë gjithsesi të kuptohej mendimi i tij për episodin në fjalë: “Faulli ndaj Griezmann? Nuk ka asgjë tjetër për të shtuar. Jemi jashtë. I përgëzojmë Arsenalin: kanë luajtur mirë. Kanë një skuadër dhe një trajner që më pëlqejnë. Ndjekin një qasje koherente, me burime financiare të konsiderueshme që u lejojnë të garojnë në këtë nivel. Urime. Do të vazhdojmë punën tonë, pa u ndalur te një detaj kaq i dukshëm”. Duke nënkuptuar se ishte e qartë që ishte penallti…
