Një vello misteri ka rrethuar zhdukjen e italianes 50-vjeçare Elisabetta Tye Ferretto me banim në Nju Jork, e cila ishte një nga gratë e para që akuzoi Jeffrey Epstein për abuzim seksual. Ajo rezulton e zhdukur që kur u kthye në Shtetet e Bashkuara më 22 prill. Autoritetet kanë thënë se po e hetojnë rastin.
Sipas Daily Mail, Ferretto, me origjinë nga Montagnana në Italinë veriore, kishte jetuar në Nju Jork që nga viti 2001, por në fillim të prillit kishte udhëtuar në rajonin e Venetos për të vizituar prindërit dhe vëllain e saj.
Megjithatë, pas kthimit të saj në Manhattan, komunikimi i përditshëm me familjen e saj u ndërpre papritur. Të afërmit e saj raportojnë se thirrjet telefonike mbeten pa përgjigje, ndërsa llogaritë e saj në mediat sociale duket se janë çaktivizuar ose fshirë.
Hetimi nga autoritetet amerikane
Familja e saj raportoi zhdukjen e saj në prokurorinë e Rovigos, e cila hapi një çështje gjyqësore, pasi ajo është shtetase italiane jashtë vendit. Çështja iu përcoll edhe Ministrisë së Jashtme italiane, e cila aktivizoi kanalet diplomatike të komunikimit me autoritetet amerikane. Sipas informacioneve, autoritetet amerikane kanë nisur një hetim, por deri më tani Ferretto nuk është gjetur.
Ish-modelja punoi në industrinë e modës pasi u transferua në Shtetet e Bashkuara, dhe më vonë u bë aktive në sektorin e pasurive të paluajtshme në New York. Emri i saj doli në pah në vitin 2019, kur ajo foli publikisht për një takim që kishte pasur me Jeffrey Epstein, i cili, sipas saj, kishte ndodhur në vitin 2004.
Ajo kishte thënë se e kishte takuar Epstein përmes agjentit të saj të modës, i cili i kishte thënë se mund ta ndihmonte të punonte me marka të mëdha. Agjenti i saj i sugjeroi të takonte një burrë "që do t'i ndryshonte jetën", duke i dhënë mundësinë të fillonte një bashkëpunim me kompaninë e famshme Victoria's Secret. Ky burrë ishte vetë Epstein, një mik i ngushtë dhe këshilltar financiar i Leslie Wexner, pronar i Victoria's Secret.
Ai u zhvesh dhe i kërkoi një masazh
Ferretto rrëfeu se kishte shkuar në rezidencën e Epstein në Upper East Side, duke menduar se ishte një takim pune. Ajo u tha hetuesve dhe mediave se në rezidencë ishte pritur nga bashkëpunëtorja e Epstein, Ghislaine Maxwell, e cila e kishte çuar në zyrën e tij.
Atje, tha ajo, financieri nuk e kishte shqyrtuar CV-në e saj, por në vend të kësaj ishte zhveshur dhe ishte shtrirë në një tavolinë masazhi. Ferretto pretendoi se ajo kishte refuzuar dhe ishte larguar menjëherë.
Asnjë shpjegim për zhdukjen e Ferrettos
Jeffrey Epstein, një i dënuar për krime seksuale, vdiq në një burg të Nju Jorkut në gusht 2019, ndërsa priste gjyqin për akuzat për trafikim seksual. Familja e Ferrettos thotë se ajo kishte qenë në kontakt të rregullt me ta deri në ditën kur u zhduk dhe se heshtja e saj e papritur është e pazakontë. ©LAPSI.al
