Irani ka ekzekutuar dy persona të akuzuar për spiunazh dhe bashkëpunim me Izraelin, në një tjetër rast që vjen në sfondin e tensioneve të forta në rajon. Sipas mediave shtetërore iraniane, dy të dënuarit, Yagub Karibur dhe Nasser Bekrzadeh, janë varur pasi u shpallën fajtorë për bashkëpunim me shërbimet izraelite të inteligjencës. Autoritetet nuk kanë bërë publike detaje mbi kohën e arrestimit të tyre.
Sipas të njëjtave burime, Karibur akuzohej se kishte mbledhur dhe transmetuar informacione përmes fotografive dhe materialeve filmike gjatë konfliktit, të cilat më pas i kishte dërguar shërbimeve izraelite. Ndërsa Bekrzadeh dyshohet se kishte furnizuar me të dhëna për figura fetare, zyrtarë rajonalë dhe zona strategjike, përfshirë edhe rajonin e Natanzit, ku ndodhet një nga objektet kryesore bërthamore të Iranit.
Rasti vjen në një kohë kur autoritetet iraniane kanë intensifikuar arrestimet dhe ekzekutimet, që prej përshkallëzimit të konfliktit në fund të shkurtit. Organizatat ndërkombëtare të të drejtave të njeriut e rendisin Iranin ndër vendet me përdorimin më të lartë të dënimit me vdekje në botë.
