Mediat amerikane kanë nxjerrë detaje të reja nga incidenti me armë që ndodhi në darkën e Trump me gazetarët. Momenti kur autori Cole Thomas Allen ngriti pushkën në drejtim të një oficeri të Shërbimit Sekret, i cili më pas e qëlloi, është fiksuar në një video, e cila është analizuar nga “The Washington Post”.
Kamera e sigurisë ishte pozicionuar mbi pikën e kontrollit të sigurisë jashtë Darkës së Korrespondentëve të Shtëpisë së Bardhë të shtunën e kaluar. Video zgjat vetëm 4 sekonda nga momenti kur Allen futet nga një derë, duke vrapuar sa më shpejt që mundi për një distancë prej 20 metrash, deri në momentin që doli nga fushëpamja e kamerës.
31-vjeçari më pas ra në dysheme në krye të shkallëve që të çonin në sallën e hotelit “Washington Hilton”, ku Trump ishte ulur pranë zv.Presidentit Vance dhe disa anëtarëve të kabinetit të tij.
Videoja, e cila është me rezolucion më të lartë se pamjet e kamerave të sigurisë të publikuara nga Presidenti Trump atë natë, nuk i ka fiksuar të gjitha të shtënat gjatë incidentit.
Megjithatë gazeta vëren se nuk ka asnjë tregues në video që të tregojë se Allen ka qëlluar me armën e tij, megjithëse autoritetet e kanë akuzuar atë se ka qëlluar në dhomën ku ndodhi incidenti. Për më tepër, videoja nuk tregon asnjë shkëndijë nga tyta e armës përpara se Allen, të dalë nga kuadri.
Ajo tregon një oficer duke nxjerrë armën e tij brenda dy sekondave nga shfaqja e Allen. Oficeri duket se qëllon Allen 4 herë. 3 nga këto të shtëna duket se janë drejtuar ndaj personelit tjetër të sigurisë teksa Allen vraponte pranë tyre.
Autoritetet kanë shkruar në dosje se agjentët dëgjuan "një të shtënë të fortë" teksa Allen vraponte nëpër pikën e kontrollit të sigurisë duke mbajtur një pushkë gjahu. Një oficer i Shërbimit Sekret u godit në gjoks nga një plumb, por mbijetoi me lëndime të lehta falë jelekut të tij antiplumb. Ai nxori armën e tij të shërbimit dhe qëlloi Allen "disa herë".
Allen akuzohet për komplot për të vrarë presidentin e Shteteve të Bashkuara dhe për të shtëna gjatë një krimi të dhunshëm. Ai nuk u lëndua në incident. Shërbimi Sekret nuk komentoi mbi hetimin e gazetës amerikane, por u kufizua duke theksuar se metodat e tij janë testuar shumë mirë.
Të hënën, Prokurori i Përgjithshëm Todd Blanch tha se në armën e autorit të krimit u gjet një gëzhojë, duke shtuar se hetuesit besojnë se është qëlluar me armë. Megjithatë, ai nuk donte të shpjegonte se nga vinte plumbi që goditi agjentin.
Çfarë tregon materiali vizual?
Pak pas orës 8:30 të mbrëmjes, Allen doli nga një derë anësore dhe vrapoi drejt pikës së kontrollit të sigurisë, me pushkën e tij të drejtuar nga toka, sipas videos së shqyrtuar nga gazeta.
Shihen të paktën 9 personel sigurie. Dy prej tyre po çmontojnë një portë magnetike, e cila është shtrirë në tokë, ndërsa të tjerët janë mbështetur në një mur. Shumica duken të pavetëdijshëm për afrimin e Allen. Vetëm një oficer i Shërbimit Sekret duket se reagon teksa Allen i afrohet pikës së kontrollit.
Oficeri nxjerr armën e tij teksa Allen i afrohet një porte magnetike. Ata ngrenë armët pothuajse njëkohësisht, por videoja tregon qartë vetëm oficerin duke qëlluar. Oficeri nuk duket se reagon, as në asnjë moment tjetër në video, në një mënyrë që do të sugjeronte se është goditur nga një plumb.
Në video, shihen 4 shkëndija nga tyta e armës së oficerit para se të largohet nga kuadri. Kur oficeri qëllon të shtënën e katërt, autori i krimit del nga fusha e shikimit të kamerës. ©LAPSI.al
