Ish-presidentja Vjosa Osmani nëpërmjet një videoje të publikuar në Facebook u ka bërë thirrje popullit të Kosovës për t'u bashkuar në një “mision” për “hapjen e rrugëve të mbyllura nga padrejtësitë”.
Ajo e ka cilësuar “natë të rëndë për Kosovën” dështimin e së martës për të zgjedhur presidentin dhe rrjedhimisht dërgimin në zgjedhje të reja.
“Mbrëmë ka qenë një natë e rëndë për Kosovën, por ky popull ka ditur të ngrihet edhe nga momentet më të rënda. Ka ardhur momenti që të japim dashuri për vendin tonë, mjaft më me propagandë, me urrejtje e përçarje, e ndjellje të frikës. Aty ku ka urrejtje duhet të sjellim vetëm dashuri për njëri-tjetrin dhe vendin tonë. Aty ku ka frikë duhet të sjellim shpresë, aty ku ka propagandë e shpifje duhet ta mbrojmë të vërtetën dhe vetëm të vërtetën. Të bashkohemi në këtë mision sepse rrugët që mbyllen nga padrejtësitë gjithmonë hapen nga populli”, thotë Osmani.
Gjatë dy ditëve që u zhvilluan seancat (27-28 prill), opozita bojkotoi vazhdimisht duke bërë që në sallë të mbeteshin vetëm deputetët e Vetëvendosjes dhe duke mos plotësuar kuorumin e nevojshëm. Në sallë duhet të ishin të paktën 80 deputetë, ndërsa ndodheshin 64.
