Një ngjarje e rëndë është regjistruar në orët e para të mëngjesit të së dielës, rreth orës 02:58 në Bulqizë, ku është djegur makina e gazetarit Sami Curri.
Zjarrvënia dyshohet të ketë qenë e qëllimshme, për shkak të detyrës së Currit si gazetar.
Makina ka qenë e parkuar në afërsi të pallatit ku banonte gazetari.
Në vendngjarje kanë mbërritur zjarrfikëset por nuk kanë mundur ta fikin, ndërsa policia po kryen veprimet hetimore rreth ngjarjes dhe zbardhjen e saj.
Sipas gazetarit ky veprim behët për t’i mbyllur gojën.
Bulqizë/Informacion paraprak
Rreth orës 02:58, të datës 26.04.2026, shërbimet e Policisë janë njoftuar nga shtetasi S. C., banues në Bulqizë (me profesion gazetar), se automjeti i tij tip “Ford Fiesta” ishte përfshirë nga flakët, ndërkohë që ishte i parkuar pranë banesës së tij.
Menjëherë pas marrjes së njoftimit, shërbimet e Policisë, grupi hetimor dhe shërbimi zjarrfikës kanë shkuar në vendngjarje.
Grupi hetimor, nën drejtimin e Prokurorisë, po vijon intensivisht veprimet për zbardhjen dhe dokumentimin ligjor të rastit, identifikimin dhe vënien para përgjegjësisë ligjore të autorit/ve, pasi paraprakisht dyshohet për djegie të qëllimshme.
Materialet do t’i kalojnë Prokurorisë për veprime të mëtejshme.
