Ishte e pamundur të vazhdohej me Liam Rosenior te Chelsea, pas serisë së tmerrshme negative që ka parë “Blues” të humbasin të pesë ndeshjet e fundit në Premier League, madje pa shënuar asnjë gol (një gjë që nuk ndodhte që nga viti 1912). Shkarkimi i trajnerit 41-vjeçar – i cili gjithsesi kishte një kontratë shumë të majme deri në vitin 2032 – vulos dështimin e ndryshimit në pankinë gjatë sezonit me italianin Enzo Maresca. Është e qartë për të gjithë se përzierja aktuale që mban në fanellë stemën e Chelsea nuk është as e afërt me atë skuadër që, me teknikun Maresca në stol, fillimisht ishte kthyer në Champions League dhe më pas kishte fituar Kupën e Botës për Klube verën e kaluar. E tani, të gjithë janë kundër të gjithëve, edhe pse fajtor duket se kanë gjetur argjentinasin Garnacho.
Një krizë që nuk është vetëm e lojës dhe e rezultateve ajo e londinezëve, duke qenë se zërat nga dhomat e zhveshjes flasin për përçarje të brendshme. Pa harruar rastin e zv.kapitenit Enzo Fernandez, i përjashtuar për dy ndeshje pasi kishte lënë të kuptohej dëshira e tij për t’u transferuar te Real Madrid, ndeshja e humbur në shtëpi 1-0 kundër Manchester United të shtunën e kaluar (e parafundit para 0-3 me Brighton që të martën vulosi fatin e Rosenior) pa shpërthimin e pakënaqësisë ndaj Alejandro Garnacho nga ana e shokëve të skuadrës.
Çfarë ndodhi me Garnacho në dhomat e zhveshjes së Chelsea
Sulmuesi 21-vjeçar, i lindur në Spanjë dhe i natyralizuar argjentinas, kishte hyrë në minutën e 16-të të ndeshjes me United për shkak të dëmtimit të Estevao, por paraqitja e tij ishte zhgënjyese, me shumë topa të humbur. Në veçanti, Garnacho markoi dobët ish-kapitenin e tij Bruno Fernandes kur portugezi u hodh në krah për të dhënë asistin për Matheus Cunha për golin e fitores, i realizuar në fundin e pjesës së parë.
Një burim i brendshëm i dhomave të zhveshjes i ka treguar “The Sun” se disa shokë skuadre të Garnacho e kanë sulmuar verbalisht gjatë pushimit, duke e qortuar për gabimet dhe qëndrimin. Argjentinasi i ri ka zhgënjyer pritshmëritë që nga ardhja e tij verën e kaluar te Chelsea nga United për mbi 50 milionë euro mes kartonit dhe komisioneve. Edhe një pjesë e madhe e tifozëve të “Blues” e ka braktisur dhe një largim në verë nuk është i pamundur, nëse klubi londinez gjen një blerës të interesuar për ato shifra.
