Real Madrid mund Alaves 2-1 në shtëpi dhe shkon në 6 pikë nga kryesuesja Barcelona, e cila do të luajë sonte në Camp Nou kundër Celta Vigo. Në rast fitoreje të katalanasve, edhe pse duhet luajtur ende përballja direkte në Katalonjë, të imagjinosh një skenar ndryshe – me gjashtë javë nga fundi – për një fitore të La Liga-s duket fantashkencë. I kuptueshëm reagimi i tifozëve në Bernabeu që vërshëlluan lojtarët e Real, mbi të gjithë Vinicius Junior.
Bernabeu vërshëllen lojtarët e Real Madrid: plaga e Champions është e freskët
Ishte një mbrëmje surreale në Bernabeu, me vërshëllima të shumta për shumë lojtarë, nga portieri Lunin para fillimit të ndeshjes te Camavinga kur hyri në fushë (mbi ta rëndojnë respektivisht gabimi i rëndë dhe kartoni i kuq në përballjen e dyfishtë të humbur me Bayern Munich), por mbi të gjitha ndaj Vinicius, i identifikuar si fajtor i sezonit pa tituj të Realit, jo vetëm për eliminimin nga Champions, por sidomos për faktin që kishte nisur të prishte gjithçka kur tetorin e kaluar, i zëvendësuar nga Xabi Alonso në Clasico-n e fituar që i kishte çuar madrilenët në +5 ndaj Barcelonës, kishte sharë trajnerin, i cili më pas u shkarkua dhe u zëvendësua nga Arbeloa që nuk u tregua në lartësinë e rolit.
Vinicius shënon dhe kërkon falje: publiku përgjigjet me ovacion
Të martën në mbrëmje kishte të gjitha kushtet që 25-vjeçari brazilian të dilte jashtë kontrollit siç i ndodh shpesh dhe të reagonte keq ndaj kritikave të publikut, por përkundrazi ai i befasoi të gjithë me një sjellje krejtësisht ndryshe: në fillim të pjesës së dytë – pasi shënoi golin e dytë të Realit me një goditje të bukur nga jashtë zone që përfundoi në cepin e portës – u ndal, nuk festoi dhe bashkoi duart për të kërkuar falje.
Sulmuesi brazilian, që është prej 8 vitesh në Madrid dhe ka kontribuar në mënyrë të madhe në tre tituj të La Liga-s dhe dy Champions të fituara në këtë periudhë, me atë gjest ka dashur të kërkojë falje për gjithçka: nga rendimenti shpesh i dobët në sezon te sjelljet e papjekura në fushë ndaj kundërshtarëve por edhe shokëve të skuadrës, pa përmendur konfliktin e vazhdueshëm me tifozët e skuadrave të tjera.
Lexo më tej: Vinicius shpërthen kundër Bellingham në fund të Bayern-Real Madrid: “Mbylle gojën”
Vinicius kërkoi falje sepse mendoi se ishte gjëja e duhur për t’u bërë, një gjest që mund të jetë fillimi i një lojtari ndryshe, një ndryshim që klubi ia kishte kërkuar prej kohësh. Nga ana e tyre, tifozët e Bernabeu iu përgjigjën faljes me një ovacion të fuqishëm. Me sa duket edhe ata prisnin vetëm këtë për t’u zbutur.
