Anija kontejnerë me flamur iranian “Touska” është sekuestruar nga forcat amerikane pranë brigjeve të Iranit, mes dyshimeve se transportonte materiale me përdorim të dyfishtë që mund të shërbejnë edhe për qëllime ushtarake.
Sipas United States Central Command (CENTCOM), anija nuk iu bind paralajmërimeve të përsëritura gjatë një periudhe gjashtëorëshe, duke shkelur embargon e vendosur nga SHBA-të ndaj Iranit. Operacioni u zhvillua pranë portit Chabahar në Gjirin e Omanit.
“Touska”, një anije e vogël kontejnerësh në pronësi të Islamic Republic of Iran Shipping Lines, grup i sanksionuar nga SHBA që prej vitit 2019, dyshohet se transportonte artikuj si metale, tuba dhe komponentë elektronikë – materiale që mund të përdoren si në industri, ashtu edhe në programet ushtarake.
Burime të sigurisë detare thanë se anija kishte një histori të mëparshme transporti të artikujve të tillë dhe se kishte kryer një udhëtim nga Azia përpara se të ndalohej. Sipas të dhënave të gjurmimit detar, ajo ishte parë më herët pranë porteve kineze dhe më pas kishte ndaluar në Malajzi për të ngarkuar kontejnerë shtesë, përpara se të mbërrinte në Gjirin e Omanit.
Autoritetet iraniane reaguan ashpër ndaj incidentit. Ministria e Jashtme e Iranit e cilësoi ndërhyrjen si “të paligjshme” dhe një shkelje të ligjit ndërkombëtar, duke kërkuar lirimin e menjëhershëm të anijes dhe ekuipazhit. Ushtria iraniane akuzoi SHBA-të për “pirateri të armatosur” dhe theksoi se anija po udhëtonte nga Kina.
