Mediat kanë publikuar pamje nga momenti kur mbeturinat e një marketi në katin zero të pallatit "Arlis" në zonën e “Farmacisë 10” në kryeqytet marrin flakë. Më pas zjarri përfshiu fasadën e objektit, duke shkrumbuar rreth 30 apartamente.
Flakët nisën rreth 16:34 të së martës dhe në pamje shihen kartonët e mbeturinave në flakë. Në pak sekonda zjarri përhapet menjëherë, duke prekur edhe një prej kolonave të fasadës së objektit 12-katësh.
Sipas të njëjtave burime ka dyshime se zjarri ka nisur si pasojë e një shkëndije. Dyshohet se disa të mitur u bënë shkak që mbeturinave të marketit t’u vihej flaka.
Aktualisht policia ka 8 persona nën hetim: 4 prej tyre u arrestuan pas ngjarjes, por u liruan nga Gjykata e Tiranës, si dhe 4 të tjerë që u proceduan në gjendje të lirë, mes të cilëve edhe pronari i kompanisë ndërtuese “Arlis”, Armand Lilo.
Autoritetet po hetojnë jo vetëm për shkaqet e zjarrit, por edhe nëse pallati ka pasur standardet e sigurisë kundër zjarrit. ©LAPSI.al
