Të shohësh Real Madrid të eliminohet në çerekfinalet e Champions League nuk është e pranueshme. As për tifozët, as për presidentin, as për historinë dhe lavdinë e një klubi që ka ngritur më shumë se kushdo tjetër këto trofe, plot 15. Ky ishte thelbi i fjalimit që Florentino Perez u mbajti lojtarëve të tij një ditë pas humbjes poshtëruese ndaj Bayern Munich që u kualifikua në gjysmëfinale. Fjalë të ashpra që parashikojnë një revolucion, jo edhe aq të heshtur, në prag të merkatos verore: “E vlerësoj përpjekjen tuaj, por kjo sezon ka qenë një zhgënjim i vërtetë për të gjithë”.
Lajmi vjen nga Spanja, përmes rindërtimit të gazetës Sport që ka zbuluar fjalët e numrit një të Blancos disa orë pas katastrofës europiane që pa Real Madrid të largohej sërish nga turneu në çerekfinale. Vitin e kaluar ishte Arsenal, këtë herë ishte Bayern Munich që festoi, me Blancos që nuk luajnë një finale që nga viti 2024, kur mundën Borussia Dortmund duke ngritur trofeun e 15-të. Shumë pak për traditën madrilene, aq sa e shtyu Florentino Perez të shpërthente ndaj lojtarëve të tij.
Fjalimi i ashpër i Florentino Perez: “Dy sezone pa trofe janë të papranueshme”
“E dini sa kërkuese është të jesh lojtar i Real Madrid. Një sezon pa trofe është një dështim sepse jemi Real Madrid, por dy sezone pa trofe janë të papranueshme”, do të kishte thënë Florentino Perez skuadrës, duke iu referuar momentit aktual që po kalon ekipi pas largimit të Carlo Ancelotti: në sezonin 2024-2025 Real Madrid fitoi Superkupën e Europës dhe Superkupën Ndërkontinentale, më pas asgjë. “Përveçse një privilegj, të veshësh këtë fanellë është edhe një përgjegjësi”, do të kishte shtuar ai.
Florentino Perez dorëzohet: “Të paktën mbylleni sezonin me dinjitet”
Më pas, pjesa më e ashpër e qortimit që mund të paralajmërojë edhe vendime të forta për merkaton: “Shumë prej jush nuk janë treguar në lartësinë e këtyre përgjegjësive dhe nuk kanë përmbushur pritshmëritë e klubit. Ju kërkoj të paktën të mbyllni këtë sezon me pak dinjitet”, duke e konsideruar tashmë të humbur edhe La Liga, ku Reali është -9 nga Barcelona me 7 javë nga fundi.
