Barcelona nuk ka ndërmend të tërhiqet dhe, pavarësisht se UEFA refuzoi ankesën e parë për arbitrimin kundër Atletico Madrid, ka paraqitur një tjetër apel për të denoncuar “dëmet sportive dhe ekonomike” të pësuara për shkak të një “grumbullimi gabimesh që kanë pasur ndikim të drejtpërdrejtë në zhvillimin e ndeshjeve dhe rezultatin final”, duke sjellë eliminimin nga Champions League. Komunikata e klubit katalanas është shumë më tepër se një listë ankesash, por një akt akuze shumë i ashpër që nis nga ajo që ndodhi në përballjen e dyfishtë. Ka një pjesë të veçantë që e rëndon tonin: Barça i referohet qartë “vendimeve arbitrale jo në përputhje me rregullat e lojës – kjo është pjesa më interesante –, për shkak të zbatimit të gabuar të rregullores dhe moszbatimit në kohë të VAR”.
Cilat janë rastet e denoncuara nga Barcelona
Barcelona kishte protestuar për një penallti të pa dhënë nga arbitri rumun Istvan Kovacs (dhe as e sinjalizuar për rishikim nga VAR-i, Christian Dingert dhe Tiago Martins) për një prekje me dorë të Pubill pas një rivënieje nga porta të portierit Musso. U konsiderua e tepruar edhe përjashtimi i Cubarsi. E gjithë kjo lidhet vetëm me ndeshjen e parë (humbur në shtëpi 0-2), por ka ankesa edhe për kthimin.
Konkretisht: përjashtimi i Eric Garcia dhe goli i anuluar i Ferran Torres, situata që do të kishin ndikuar në zhvillimin e ndeshjes (katalanasve nuk u mjaftoi fitorja 1-2 në Madrid). Situata që e shtynë edhe Raphinha (tashmë në shënjestër për disa gjeste ndaj tifozëve kundërshtarë) të fliste madje për “vjedhje”, duke ushqyer dyshime mbi menaxhimin e ndeshjes nga arbitri dhe duke rrezikuar edhe një pezullim të rëndë.
Për këtë arsye blaugranat kanë vendosur të paraqesin një ankesë, duke kërkuar shpjegime nga UEFA për eliminimin dhe duke theksuar një seri gabimesh të pabesueshme dhe të papranueshme.
Hapja për bashkëpunim me UEFA-n për “të shmangur situata të ngjashme”
Pjesa e parë e komunikatës është një sulm frontal, ndërsa e dyta është në frymën e bashkëpunimit për të përmirësuar sistemin e arbitrimit, në mënyrë që të garantohet një zbatim më rigoroz dhe i drejtë i rregullave, që situata të tilla “të mos përsëriten më në të ardhmen”.
