Negociatorët nga Shtetet e Bashkuara dhe Irani kanë bërë përparim në bisedimet e së martës dhe janë afër një marrëveshjeje kornizë për t'i dhënë fund luftës. Lajmin e jep agjencia Axios që citon zyrtarë amerikanë. Megjithatë, zyrtarët paralajmëruan se një marrëveshje nuk është e garantuar, duke pasur parasysh dallimet që mbeten midis dy palëve.
Një nga zyrtarët amerikanë tha se ekipi negociator i Presidentit Trump – zv.presidenti Vance, i dërguari i Shtëpisë së Bardhë Steve Witkoff dhe këshilltari i lartë Jared Kushner – kanë vazhduar të bëjnë telefonata dhe të shkëmbejnë propozime të draftit me iranianët dhe ndërmjetësit edhe të martën.
“Ata kanë qenë në telefon dhe po bisedojnë me të gjitha vendet dhe po afrohen" - tha ai.
Një zyrtar i dytë amerikan konfirmoi përparimin të martën, duke vënë në dukje se "ne duam marrëveshjen, pjesë të qeverisë duan marrëveshjen. Plani është që e gjithë qeveria të sillet në marrëveshje".
Ka optimizëm nga pala amerikane se jemi afër një marrëveshjeje dhe se pala iraniane është gjithashtu e gatshme të bjerë dakord.
Të dyja palët, me ndihmën e Pakistanit, Egjiptit dhe Turqisë që ndërmjetësojnë, po përpiqen të kapërcejnë mosmarrëveshjet dhe të arrijnë një marrëveshje përpara se të skadojë armëpushimi më 21 prill. Ndërkohë, një delegacion pakistanez i udhëhequr nga shefi i ushtrisë, Feldmarshal Asim Munir, mbërriti sot në Teheran për bisedime me zyrtarë iranianë.
Wall Street Journal raportoi të mërkurën se Shtetet e Bashkuara dhe Irani kanë rënë dakord në parim për një raund të dytë bisedimesh, megjithëse vendi dhe koha janë ende duke u negociuar. Ka të ngjarë që ato të mbahen përsëri në Pakistan.
Nëse arrihet një marrëveshje kornizë, armëpushimi do të duhet të zgjatet në mënyrë që të fillojnë negociatat për detajet e një marrëveshjeje gjithëpërfshirëse, raportoi Axios, duke cituar një zyrtar amerikan dhe një burim të njohur me çështjen.
“Detajet janë të ndërlikuara - nuk mund ta bësh këtë në dy ditë", tha një zyrtar amerikan, ndërsa një tjetër tha se "Shtetet e Bashkuara nuk kanë rënë dakord zyrtarisht për një zgjatje të armëpushimit, ka kontakt të vazhdueshëm midis Shteteve të Bashkuara dhe Iranit për të arritur një marrëveshje".
Megjithatë, duket se bllokada detare e Trumpit — e cila synonte kufizimin e eksporteve të naftës së Iranit — dhe kriza ekonomike në përkeqësim e vendit po rrisin presionin mbi Teheranin për të arritur një marrëveshje.
“Irani nuk ka para. Është i falimentuar. Ne e dimë këtë. Dhe ata e dinë që ne e dimë”, - tha një zyrtar amerikan për Axios. ©LAPSI.al
