Presidenti i SHBA-së, Donald Trump, përsëriti të hënën se nuk ka ndërmend t'i kërkojë falje Papa Leonit XIV, të cilin e kritikoi ashpër dhe e përshkroi si "shumë të dobët".
“Papa Leoni tha gjëra që janë të gabuara. Ai ishte shumë kundër asaj që bëj unë me Iranin dhe ne nuk mund të pranojmë një Iran që ka armë bërthamore", - tha presidenti i SHBA-së nga Shtëpia e Bardhë, duke iu referuar deklaratave të Papës që bënin thirrje për t'i dhënë fund luftës në Iran.
Në postimet e tij, Trump akuzoi Papën, të parin Papë të lindur në SHBA, se ishte “i dobët ndaj krimit dhe i tmerrshëm në politikën e jashtme”. Ai gjithashtu pretendoi se “nëse nuk do të isha unë në Shtëpinë e Bardhë, Leoni nuk do të ishte në Vatikan”.
Të dielën, Trump postoi në Truth Social një imazh të vetes të gjeneruar nga inteligjenca artificiale si Jezusi. Imazhi mori reagime negative edhe nga qarqet konservatore në Shtetet e Bashkuara që tradicionalisht e mbështesin atë.
Këtë të hënë ai e fshiu postimin.
Në foto, Trump duket i veshur me një rrobë të bardhë me një pelerinë të kuqe, duke mbështetur dorën në ballin e një pacienti, i rrethuar nga njerëz që luten ose presin diçka, dhe në sfond një flamur amerikan, Statuja e Lirisë, avionë luftarakë, shqiponja dhe figura të tjera.
“Duhej të më tregonte si një mjek që i shëron njerëzit", - u justifikua Trump pasi e fshiu imazhin. Presidenti amerikan mohoi se imazhi kishte për qëllim ta portretizonte atë si Jezusin, duke e quajtur atë "lajm të rremë".
"Supozohet të më portretizojë mua si një mjek që i bën njerëzit më mirë, unë i bëj njerëzit më mirë", u tha ai gazetarëve në Shtëpinë e Bardhë, pak pasi postimi u hoq.
Ndërkohë, kryeministrja italiane Giorgia Meloni e quajti sot sulmin e Trump ndaj Papës "të papranueshëm", duke u bashkuar me politikanë të tjerë italianë që nxituan të mbronin kreun e Kishës Katolike.
Deklarata e Melonit, e cila mban lidhje veçanërisht të ngushta me presidentin e SHBA-së, tregon zemërimin që mbizotëron në Itali në lidhje me sulmet e Trump ndaj Papës.
"Mendova se deklaratat që kisha bërë më parë ishin të qarta, por e përsëris me më shumë qartësi. I konsideroj deklaratat e Presidentit Trump për Papën të papranueshme", theksoi ajo. ©LAPSI.al
