Shkalla e obezitetit në Kinë po rritet ndjeshëm dhe ka dalë një modë e re: "Burgjet e dhjamit". Këto janë qendra të stilit ushtarak të projektuara për humbje të shpejtë në peshë përmes programeve të rrepta të dietës, ushtrimeve të vazhdueshme dhe mbikëqyrjes 24-orëshe që i pengon pjesëmarrësit të... hanë fshehurazi.
Në Kinë, numri i fëmijëve obezë është katërfishuar që nga viti 2000 dhe qeveria thotë se më shumë se gjysma e të rriturve kinezë janë mbipeshë. Autoritetet shëndetësore kanë paralajmëruar se 65% e të rriturve në Kinë mund të jenë mbipeshë ose obezë deri në vitin 2030. Ndaj vitet e fundit, Kina ka parë një bum mbarëkombëtar të qendrave që premtojnë humbje të shpejtë në peshë brenda një muaji.
Pjesëmarrësit regjistrohen vullnetarisht - zakonisht për një qëndrim njëmujor - por nëse hyjnë brenda, largimi nuk është i lehtë. Objektet janë të rrethuara, me porta çeliku dhe madje edhe tela elektrikë për të dekurajuar arratisjet, dhe daljet ruhen nga personeli i sigurisë 24/7.
Ka programe dyjavore, por trajnerët inkurajojnë regjistrimin për programin e plotë 28-ditor, duke pretenduar se kjo jep rezultatet më të mira. Në fakt, shumë programe janë të hapura për të huajt, dhe njohja e gjuhës mandarine ose kantoneze nuk është një parakusht.
“Burgu” për njerëzit obezë me 513 euro në muaj
TL Huang nga Australia, e njohur në mediat sociale si "Egg Eats", tregoi se si është jeta pas kompleksit të rrethuar për njerëzit obezë. Gruaja e re dokumentoi orarin e saj intensiv ditor, që nga zgjimi në orën 7:30 të mëngjesit dhe peshimi i vetes deri te orët e stërvitjes me spinning dhe boks. Deri në ditën e shtatë, ajo tha se kishte humbur 2 kilogramë, dhe deri në ditën e 14-të, kishte humbur 1.2 kilogramë.
Ajo pagoi 513 dollarë për programin njëmujor me të gjitha shpenzimet e paguara, i cili përfshin 4 orë ushtrime në ditë gjatë 19 orëve mësimore në javë, ose 72 orëve mësimore në total. Pjesëmarrësit hipnin në peshore dy herë në ditë: në mëngjes dhe në orën 7:30 të mbrëmjes.
Vaktet shërbeheshin në porcione në tabaka metalike. Egg Eats postoi një video të mëngjesit të saj, ku tregohej se i jepeshin vezë dhe perime të ziera, ndërsa dreka dhe darka përbëheshin nga perime, mish dhe oriz. Vaktet ishin hartuar për të imituar një dietë tipike kineze, në mënyrë që pjesëmarrësit të mos hanin tepër kur të largoheshin nga programi. Lejohej një porcion i dytë.
Trajnerët kryejnë rregullisht kontrolle në dhoma, duke konfiskuar ushqimin e fshehur ose, siç e quan Egg Eats, "karbohidrate të kontrabanduara" dhe duke lëshuar paralajmërime për ata që shkelin rregullat. Dhomat si në konvikte akomodojnë deri në 5 persona dhe kanë banja të përbashkëta, ambiente lavanderie në natyrë, tavolina individuale dhe hapësirë bazë magazinimi. Të dielave, pjesëmarrësit kanë pushim, por duhet të ndjekin një kurs spinning në mbrëmje. Pavarësisht regjimit të rreptë, gruaja e re thotë se nuk pendohet që u regjistrua dhe ka bërë shumë miq gjatë qëndrimit të saj.
Në një intervistë me abc.net.au, TL Huang tha se po udhëtonte nëpër Azi pasi la punën në Australi kur nëna e saj i tregoi për kampet e humbjes së peshës. "Mendova, pse të mos e provoja dhe të humbisja edhe unë pak peshë?" - tha ajo.
Pasi iu bashkua një grupi WeChat që drejtonte qendrën dhe iu përgjigj disa pyetjeve në lidhje me qëllimet e saj për humbje peshe, një makinë iu dërgua për ta çuar në qendër.
Atje, ajo nënshkroi një kontratë duke rënë dakord me rregullat: asnjë ushqim jashtë, pjesëmarrje e detyrueshme në të gjitha klasat e fitnesit dhe asnjë dalje pa leje.
“Për mua, si e huaj, ishte mjaft e frikshme. Ishte një përvojë paksa e frikshme sepse nuk isha e sigurt nëse po shkoja në një kamp të vërtetë", tha ajo. "Kishte një vajzë në grupin tim, ajo kishte humbur 30 kg. Mendoj se kishte qenë atje për rreth 4 muaj. Ishte çmenduri", - shtoi ajo.
“Egg Eats” publikoi gjithashtu një video pasi përfundoi programin 28-ditor. Ajo filloi me një peshë prej 85.6 kilogramësh dhe arriti në 79.6.
Sipas saj, pasi doli nga programi, zbuloi se gjëja më e vështirë ishte kthimi në shtëpi pasi "trupi nuk e di më se si është të hash normalisht".
Ajo postoi gjithashtu një video ku tregon rënien e flokëve: "Humbja e peshës mund të shkaktojë shpejt rënie të përkohshme të flokëve. Kjo zakonisht është rënie e flokëve e lidhur me stresin dhe ndodh 6-12 javë pas humbjes së shpejtë të peshës, deficitit kalorik, sëmundjes, stresit të rëndë ose çekuilibrit hormonal. Zakonisht është e përkohshme, por nëse vazhdon, do të bëj analiza gjaku."
Vdekja e influencueses në vitin 2023
Në vitin 2023, influencuesja 21-vjeçare Cuihua vdiq pasi mori pjesë në një nga programet në Kinën veriore, në një përpjekje për ta përgjysmuar peshën e saj trupore. Cuihua Zhou, e cila peshonte 156 kilogramë, kishte ndarë udhëtimin e saj për humbje peshe në Douyin, duke i frymëzuar ndjekësit e saj para vdekjes së saj të papritur. Mediat shtetërore raportuan se ajo kishte marrë pjesë në disa programe në qytete të ndryshme, duke humbur më shumë se 27 kilogramë në dy muaj.
Programe të rrezikshme
Profesori i asociuar Pan Wang nga Universiteti i Uellsit të Ri Jugor tha se qeveria duhet të monitorojë dhe rregullojë dietat dhe programet e ushtrimeve që mund të jenë të rrezikshme. “Industria e bukurisë po lulëzon dhe koncepti i dobësisë është bërë një lloj kapitali shoqëror. Bizneset si kampet e humbjes së peshës po përfitojnë nga kjo”, - tha Dr. Wang. ©Përgatiti LAPSI.al
