Ndeshja e parë çerekfinale e Europa League mes Portos dhe Nottingham Forest u shndërrua në një makth sportiv për Martim Fernandes, mbrojtësin e ri të luzitanëve që u bë protagonist, pa dashjen e tij, i një serie të pabesueshme ngjarjesh negative që zgjatën gjashtë minuta. Fillimisht ai bëri një nga gabimet më groteske dhe më fatkeqe të sezonit, duke shënuar një autogol të bujshëm dhe duke u dhuruar anglezëve barazimin. Më pas u detyrua të largohej nga fusha për shkak dëmtimi dhe për të dalë nga terreni i lojës iu desh të përshkonte gjithë perimetrin duke çaluar për të arritur te hyrja e dhomave të zhveshjes. Çfarë goditjeje, vërtet.
Porto e nis fort në “Estadio do Dragao”
Atmosfera në “Estadio do Dragao” është ajo e netëve të mëdha të Kupave. Stadiumi është i mbushur plot, qoftë Champions apo një kompeticion i një niveli më të ulët nuk ka rëndësi. Nxehtësia e mbi 50 mijë spektatorëve është pasqyrë direkte e pasionit për “dragonjtë”. Dhe pikërisht ndryshimi i menjëhershëm i humorit, “ohhh”-të e habisë dhe heshtja varri që shoqëruan momentin më të vështirë të ndeshjes, shpjegojnë mirë goditjen psikologjike të marrë. Brenda pak minutash u kalua nga euforia për avantazhin e shënuar në minutën e 11-të nga William Gomes (goditje perfekte me kokë pas krosit të Gabri Veiga) te depresioni, sepse pak çaste më pas ndodhi diçka krejtësisht e papritur.
Autogoli më absurd i mbrëmjes
Menjëherë pas golit të avantazhit, Fernandes gjendet nën një presion të moderuar në krahun e djathtë. Nuk është nën një markim të ngushtë. Nuk i ka linjat e pasimit të bllokuara. Është gjithashtu mjaft larg portës. Me pak fjalë, mund të bëjë çfarë të dojë (madje edhe të zgjedhë ta nxjerrë topin në rivënie anësore ose ta godasë larg), por zgjedh zgjidhjen më të keqe. Në përpjekje për të lehtësuar aksionin, vendos të pasojë topin drejt portierit të tij, Diogo Costa.
Dhe këtu ndodh rrëmuja. Mbrojtësi e bën pasimin pa kontrolluar pozicionin e portierit. Topi merr një trajektore perfekte dhe përfundon në rrjetë pa mundur Costa të bëjë asgjë për ta ndalur apo qoftë edhe për ta devijuar… gol, por në portën e gabuar. Publiku e ka të vështirë të kuptojë se çfarë ndodhi. Edhe rreth 3 mijë tifozët anglezë të pranishëm në sektorin mik mbeten të habitur përpara se të shpërthejnë nga gëzimi.
Nga autogoli te dëmtimi: gjashtë minuta për t’u harruar
Sikur autogoli të mos ishte mjaftueshëm i rëndë, tre minuta më vonë mbrojtësi ndien një problem fizik dhe rrëzohet në tokë në anën e kundërt të fushës, pikërisht poshtë sektorit të tifozëve të Nottingham Forest. Pasi provoi të rikthehej në lojë, Fernandes dorëzohet: nuk mund të vazhdojë, dhe në minutën e 19-të vjen zëvendësimi. Ai del nga fusha jo pa bërë më parë gjithë xhiron e stadiumit, i shoqëruar nga duartrokitjet inkurajuese të tifozëve të Portos.
