Një video që tregon Wojciech Szczesny-n duke u fshehur në pankinën e Barcelonës për të vendosur një snus larg kamerave është bërë virale, me miliona shikime. Që portieri polak, ish-lojtar i Juventusit, është një duhanpirës i zjarrtë nuk është sekret dhe ai vetë e ka pranuar disa herë në të kaluarën. Megjithatë, edhe për të duhet të ketë qenë e tepërt që varësia e tij ndaj nikotinës të shihej gjatë kohës që ishte në punë: “Tek” ishte në pankinë mes rezervave të Barcelonës në Madrid të shtunën e kaluar, gjatë ndeshjes së fituar 2-1 ndaj Atletico Madrid, por gjithsesi ishte në dispozicion të Flick.
Szczesny i kërkon Bardghji ta fshehë nga kamerat teksa vendos snus-in në gojë
Pamjet janë të qarta: Szczesny, i ulur në pankinë si rezervë e portierit titullar Joan Garcia, në një moment i kërkoi të riut Roony Bardghji ta mbulonte nga kamerat për të futur një snus në gojë pa u kapur. Polaku, që do të mbushë 36 vjeç pas pak ditësh dhe ka ende një vit kontratë me Barcelonën, u përkul pas shokut të skuadrës, i cili iu afrua pikërisht për këtë qëllim. Më pas pjesa tjetër u kuptua lehtësisht, pasi më herët ishte parë që portieri mbante në duar bustinën. Më pas e futi nën buzë dhe hodhi letrën qetësisht poshtë karriges.
Çfarë është snus-i, si përdoret dhe nëse është i ligjshëm
Snus-i është një lloj duhani i lagësht pa tym me origjinë suedeze. Ai përbëhet nga duhan i bluar, i lagur, i pasterizuar dhe i aromatizuar, që shitet në kuti. Si i tillë, ai është i ndaluar në të gjithë Bashkimin Europian, përfshirë Spanjën dhe Italinë, me përjashtim të Suedisë. Megjithatë ekziston edhe versioni modern, në formën e bustinave me nikotinë që nuk përmbajnë duhan, por vetëm nikotinë, ujë, fibra bimore dhe aromatizues: këto janë më të zakonshmet sot dhe ato që përdorte ligjërisht Szczesny në videon në fjalë.
Shumë i përhapur mes futbollistëve të Premier League, snus-i në bustina përdoret duke e vendosur mes buzës së sipërme dhe mishit të dhëmbëve. Ai mbahet aty për 30-60 minuta, gjatë së cilës nikotina përthithet drejtpërdrejt nga mukoza orale. Në fund bustina pështyhet, pra nuk përtypet dhe nuk pihet si duhan. Në Spanjë snus-i është i ligjshëm në këtë formë, por e ardhmja e tij është në rrezik, pasi qeveria propozon kufizime të forta: maksimumi 0.99 mg nikotinë për bustinë dhe ndalimin e aromave të ndryshme nga duhani. Nëse kjo normë do të miratohet, përdorimi i tij do të bjerë ndjeshëm. Pra, edhe pse është i rregulluar, snus-i nuk shihet aspak mirë dhe për këtë arsye Szczesny e përdori në mënyrë pothuajse klandestine.
