Idrissa Gueye ishte protagonist në barazimin mes Udinese e Como, por jashtë fushe nuk po kalon momente të lehta. Javën e kaluar, senegalezi u ndalua nga policia kufitare e Triestes në pikën kufitare të Fernetti, ndërsa kthehej nga Sllovenia, dhe me habi të madhe zbuluan se kishte me vete një patentë false. Audi i tij me cilindratë të madhe u ndalua për një kontroll rutinë në komunën e Monrupinos dhe në atë moment nisi denoncimi. Nuk dihet nëse 19-vjeçari e dinte se kishte një dokument të falsifikuar dhe nëse kjo do të jetë rruga që do të ndjekë mbrojtja për të provuar pafajësinë e tij.
Gueye u denoncua për patentë false
Ajo që duhej të ishte një kontroll krejt normal i policisë kufitare u kthye në një makth për senegalezin, i ardhur te Udinese në huazim nga Metz. Gueye ishte në zotërim të një patente false të lëshuar nga autoritetet e Senegalit dhe për të nisi menjëherë procedimi penal: agjentët i kontestuan veprën e përdorimit të dokumentit të falsifikuar, sipas nenit 489 të Kodit Penal, dhe i ndaluan përdorimin e makinës për t’u kthyer në Udine.
Gueye luajti për Udinese në javën e fundit të kampionatit
Udinese ia ka besuar çështjen avokatit Maurizio Miculan, i cili do të duhet të provojë mirëbesimin e 19-vjeçarit. Në thelb, ata do të duhet të provojnë se Gueye nuk e dinte që patenta e lëshuar nga Senegali ishte e falsifikuar dhe se ai kishte vazhduar të drejtonte makinën pa qenë në dijeni të gjithçkaje. Mund të hapet madje edhe një hetim për të kuptuar nga vjen dokumenti i falsifikuar dhe për të zbuluar rrjetin e falsifikimit. Nuk është futbollisti i parë afrikan në Europë që përfshihet në një rast të tillë dhe disa kolegë të tij kanë pasur vështirësi për të konvertuar patentat e tyre në vende të ndryshme. Klubi friulan nuk ka bërë komente dhe pas denoncimit lojtari është stërvitur normalisht, madje ka zbritur edhe në fushë ndaj Como-s, pasi ngjarja kishte ndodhur disa ditë para ndeshjes.
