Studentët shqiptarë në Maqedonia e Veriut kanë zhvilluar një protestë në Shkup, duke kundërshtuar zhvillimin e provimit të jurisprudencës kryesisht në gjuhën maqedonase, pavarësisht statusit zyrtar të gjuhës shqipe në vend.
Protesta u shoqërua me pankarta në qendër të kryeqytetit, ku një nga mesazhet kryesore ishte: “Ligji në letër, diskriminim në praktikë”. Në tubim mori pjesë një numër i konsiderueshëm studentësh.
Provimi i jurisprudencës, i domosdoshëm për ushtrimin e profesioneve juridike si avokat, gjyqtar apo prokuror, sipas studentëve zhvillohet në praktikë kryesisht në gjuhën maqedonase, duke krijuar vështirësi për kandidatët shqiptarë.
Sipas tyre, kjo situatë përbën një pengesë të drejtpërdrejtë dhe krijon pabarazi në aksesin në profesionet juridike, duke ndikuar edhe në përfaqësimin e shqiptarëve në sistemin gjyqësor.
Studentët kërkojnë që provimi të zhvillohet plotësisht në gjuhën shqipe, me procedura të barabarta për të gjithë kandidatët dhe me zbatim efektiv të të drejtave gjuhësore të garantuara me ligj.
Për betejën e studentëve për gjuhën shqipe sot ka reaguar edhe ministri i jashtëm i Shqipërisë Ferit Hoxha.
Në një postim në X, Hoxha e quan të drejtë themelore dhe legjitime përdorimin e gjuhës amëtare nga ana e studentëve shqiptarë në Maqedonië e Veriut.
“Përdorimi i gjuhës amëtare është një e drejtë themelore e garantuar nga Kushtetuta e Maqedonisë së Veriut dhe Ligji për Përdorimin e Gjuhëve e cila nuk mund dhe nuk duhet të ngushtohet apo vonohet nga asnjë procedurë” tha Hoxha.
Në reagimin e tij, Hoxha bën thirrje për shmangie të politizimit të ccështjes dhe trajtim të saj me maturi e përgjegjësi, sidomos në frymën e respektimit të të drejtave themelore.
Kryediplomati vlerësoi gjithashtu angazhimin qytetar të studentëve duke nënvizuar se zgjidhja duhet të vijë përmes dialogut konstruktiv.
"Kjo është një çështje që kërkon trajtim të matur dhe të përgjegjshëm, larg çdo përpjekjeje për politizim. Ajo duhet adresuar me seriozitet institucional dhe në frymën e respektimit të të drejtave themelore. Demokracitë jo vetëm që kanë mekanizmat, por edhe pjekurinë e nevojshme për të gjetur zgjidhje ku harmonizohen shteti ligjor, legjislacioni dhe të drejtat e qytetarëve. Studentët meritojnë përgëzim për angazhimin qytetar dhe mënyrën demokratike me të cilën kanë artikuluar kërkesën e tyre. Kjo kërkon një përgjigje me të njëjtin standard përgjegjshmërie, përmes dialogut konstruktiv dhe zgjidhjeve që respektojnë plotësisht të drejtat e garantuara."
Protestën e studentëve dhe kërkesat e tyre i kanë bështetur edhe Këshilli i Marrëdhënieve Shqiptaro-Amerikane, duke insistuar se kjo e drejtë u garantohet studentëve me Kushtetutë, Marrëveshjen e Ohrit dhe Ligjin për Përdorimin e Gjuhëve.
