Mbesa e gjeneralit iranian të vrarë në janar të 2020-ës, Qasem Soleimani dhe vajza e saj janë arrestuar nga agjentët e ICE, njoftoi të shtunën Departamenti amerikan i Shtetit. Ajo bënte një jetë luksoze në Los Angeles dhe në Instagram kritikonte SHBA-të duke i quajtur “Satani i Madh”
Hamideh Soleimani Afshar, e cila dyshohet se bëri festë për sulmet ndaj ushtarëve dhe bazave ushtarake amerikane, dhe vajzës së saj Sarinasadat Hosseiny, u është revokuar “Green Card” për shkak të lidhjeve të tyre me regjimin iranian.
“Teksa jetonte në Shtetet e Bashkuara, ajo promovonte propagandën e regjimit iranian, festoi për sulmet kundër ushtarëve amerikanë dhe objekteve ushtarake në Lindjen e Mesme, vlerësonte Udhëheqësin e ri Suprem iranian, e denonconte Amerikën si “Satani i Madh” dhe shprehte mbështetjen e saj të palëkundur për Korpusin e Gardës Revolucionare Iraniane, një organizatë e përcaktuar si terroriste”, - thuhet në një letër të Departamentit amerikan të Shtetit që konfirmonte arrestimet.
[caption id="" align="alignnone" width="797"]
Sarinasadat Hosseiny[/caption]
Afshar, 47 vjeç, hyri në SHBA në vitin 2015 me një vizë turistike, iu dha azil në vitin 2019. Ajo siguroi një Green Card në vitin 2021 nga administrata Biden. Ajo bëri të paktën 4 udhëtime për në Iran që kur mori Green Card, tha Departamenti i Sigurisë Kombëtare.
Hosseniy, 25 vjeçe, hyri gjithashtu në SHBA në vitin 2015 me vizë studentore. Ajo u bë mbajtëse e Green Card në vitin 2023.
Personaliteti i saj në internet ishte në kundërshtim me Islamin Shiit që përqafonte nëna e saj. Fotot në rrjetet e saj sociale, të cilat ajo i ka fshirë më pas, tregojnë bukuroshen me bikini, duke treguar tatuazhet e barkut apo duke pushuar në një skuter uji me rroba banje. Postime të tjera në Instagram tregojnë Hosseiny-n duke kaluar kohë në klube në Miami, duke bërë pushime në Alaska dhe duke festuar në Las Vegas.
[caption id="" align="alignnone" width="819"]
Sarinasadat Hosseiny[/caption]
“Është një privilegj të të jepet një Green Card për të jetuar në Shtetet e Bashkuara të Amerikës. Nëse kemi arsye të besojmë se një mbajtës i kartës jeshile përbën një kërcënim për SHBA-në, karta jeshile revokohet”, tha për “The Post”, Lauren Bis, një zëdhënëse e DHS-së.
Departamenti i Shtetit iu referua gjithashtu jetës ekstravagante të Afsharit në Los Angeles, të cilën ajo dyshohet se e dokumentonte shpesh në llogarinë e saj në Instagram, e cila me sa duket është fshirë gjithashtu.
[caption id="" align="alignnone" width="967"]
Hamideh Soleimani Afshar[/caption]
47-vjeçarja u pa nga “The Post” të shtunën jashtë banesës së saj me dy dhoma gjumi në zonën e Tujungas, duke futur me nxitim çanta firmato të Louis Vuitton dhe Hermes në makinën e saj Tesla Model 3, disa orë pasi arrestimi i saj u njoftua publikisht.
Fqinjët i thanë “The Post” se Afshar jetonte në një apartament me oborr në Plainview Avenue, afërsisht 20 milje në veri të qendrës së Los Angeles. Vajza e Afsharit u ndalua nga ICE teksa po drejtonte makinën.
[caption id="" align="alignnone" width="720"]
Hamideh Soleimani Afshar duke qëndruar pranë një helikopteri.[/caption]
“Vajza jeton në Hollywood. I dashuri më tha se ai dhe Sarina po udhëtonte me makinë jashtë shtëpisë kur u përplas nga makinat e ICE-së. Ai tha se agjentët po kërkonin të dinin se ku ishte nëna”, - tha një fqinj.
Fotot e Afsharit në rrjetet sociale tregojnë shijen e saj për makina dhe veshje të shtrenjta, të cilat do të ishin të paligjshme në Republikën Islamike. Në një foto, Afshar tregon një dorë me bizhuteri ari, thonj të rregulluar dhe një bluzë me kapuç Louis Vuitton.
Në një tjetër foto nga Instagrami i saj, ajo pi një shishe shampanjë në shkretëtirë pranë një helikopteri.
Burri i Afsharit, emri i të cilit nuk u bë i ditur nga Departamenti i Shtetit, tani i ndalohet gjithashtu hyrja në Shtetet e Bashkuara.
Sekretari i Shtetit Marco Rubio përshëndeti urdhrin e largimit teksa lufta e përbashkët SHBA-Izrael me Iranin ka hyrë në javën e saj të gjashtë.
“Administrata Trump nuk do të lejojë që vendi ynë të bëhet shtëpi për shtetas të huaj që mbështesin regjimet terroriste antiamerikane”, - shkroi Rubio në X.
Muajin e kaluar, Departamenti i Shtetit i dha fund gjithashtu statusit ligjor të Fatemeh Ardeshir-Larjiani, vajzës së ish-Sekretarit të Këshillit Suprem të Sigurisë Kombëtare të Iranit, Ali Larjiani.
Larijani, një person i vijës së ashpër të regjimit, i cili u konsiderua udhëheqës de facto pas sulmit izraelit që vrau Udhëheqësin Suprem Ajatollah Ali Khamenei, u vra më 16 mars nga sulmet ajrore të përbashkëta të SHBA-së dhe Izraelit.
Qasem Soleimani, i cili drejtoi forcën famëkeqe Quds në Gardën Revolucionare Iraniane, u vra në një sulm me dron të urdhëruar nga Presidenti Trump në Irak në vitin 2020 pranë Aeroportit Ndërkombëtar të Bagdadit në Irak.
Shtetet e Bashkuara pohuan se Soleimani ishte një objektiv i vlefshëm, duke pretenduar se ai po planifikonte sulme ndaj diplomatëve dhe ushtarëve amerikanë në Irak.
Irani nuk e ka harruar udhëheqësin e tij, duke i vënë emrin “Haj Qassem” një modeli të ri të raketave balistike që janë hedhur ndaj Izraelit. Sipas agjencisë së lajmeve FARS, këto raketa janë të projektuara për t'iu shmangur sistemit mbrojtës të shtetit hebre, Kupolës së Hekurt. ©Përgatiti LAPSI.al
