Korpusi i Gardës Revolucionare Islamike (IRGC) njoftoi se sistemet e tij të mbrojtjes ajrore kanë rrëzuar një “avion luftarak armik” në jug të ishullit Qeshm, sipas mediave shtetërore iraniane. Sipas deklaratës, avioni u rrëzua në Gjirin Persik, mes ishujve Hengham dhe Qeshm, megjithëse nuk u bë e ditur se cilit shtet i përkiste mjeti ajror.
Ndërkohë, IRGC pretendoi se ka ndërmarrë një seri sulmesh ndaj infrastrukturës së lidhur me kompani amerikane në rajon. Sipas tyre, një qendër të dhënash e kompanisë Oracle në Dubai u godit, ndërsa më herët u raportua për një sulm ndaj një qendre cloud të Amazon në Bahrein. Në një deklaratë zyrtare të transmetuar nga media shtetërore, Garda Revolucionare paralajmëroi për sulme të mëtejshme ndaj kompanive që, sipas saj, mbështesin interesat amerikane dhe izraelite në rajon.
“Shtatë baza ajrore që i përkasin forcave amerikane dhe izraelite u sulmuan gjatë operacionit të së mërkurës”, thuhet në deklaratë, duke shtuar se përgjegjësia për çdo përshkallëzim të mëtejshëm i takon udhëheqjes amerikane. Televizioni shtetëror iranian raportoi gjithashtu se Teherani ka ndërmarrë sulme të reja që synojnë objekte industriale dhe ushtarake amerikane në Gjirin Persik, si dhe instalime izraelite. Këto zhvillime vijnë pasi sulme të reja izraelito-amerikane goditën Iranin të enjten. Sipas raportimeve, një urë pranë Teheranit u godit dy herë, ndërsa dy nga fabrikat kryesore të çelikut në vend ndërprenë operacionet për shkak të dëmeve.
Zëdhënësi i komandës qendrore ushtarake iraniane, Ebrahim Zolfaghari, deklaroi se sulmet e reja ishin përgjigje ndaj goditjeve ndaj industrisë së çelikut të Iranit. Sipas televizonit shtetëror, objektivat përfshinin fabrika çeliku amerikane në Abu Dhabi, objekte alumini në Bahrein dhe fabrika armësh izraelite, si dhe baza ajrore në Izrael, përfshirë ato në Tel Nof dhe Palmachim. Autoritetet iraniane thanë gjithashtu se janë goditur “qendra të përqendrimit të forcave ushtarake” dhe baza amerikane në disa vende të Gjirit, duke rritur më tej tensionet në një rajon tashmë të paqëndrueshëm.
