Mircea Lucescu pësoi një tjetër infarkt këtë mëngjes në spital, ndërsa po priste të dilte nga spitali pas një sulmi të parë në zemër që e kishte goditur javën e kaluar. Trajneri u ndihmua menjëherë nga mjekët dhe u transferua në terapi intensive. Për momentin gjendja e tij është stabile, por situata monitorohet vazhdimisht nga mjekët e Spitalit Universitar të Bukureshtit. Ish-trajneri i kombëtares së Rumanisë – mbrëmë erdhi edhe komunikata zyrtare e Federatës që duket se është gati t’ia besojë pankinën e kombëtares rumune Gheorghe Hagi – ishte ndier keq edhe në dhomat e zhveshjes gjatë një mbledhjeje teknike në prag të ndeshjes me Sllovakinë.
Kjo është deklarata e spitalit për atë që ndodhi: “Në mëngjes, pacienti pësoi një infarkt akut të miokardit (sulm në zemër). Ai u trajtua urgjentisht dhe u zbatuan menjëherë procedurat e nevojshme mjekësore dhe terapeutike në përputhje me protokollet në fuqi. Pacienti aktualisht është në gjendje stabile dhe monitorohet me kujdes nga specialistët. Pacienti mbetet i shtruar në repartin e kardiologjisë, ku po merr trajtimin e duhur mjekësor”.
Lexo më tej: Lucescu, të fikët në stërvitjen e Rumanisë: direkt në spital, si është gjendja e tij
Vetëm të martën e kaluar trajnerit 81-vjeçar iu implantua një defibrilator për të rregulluar rrahjet e zemrës. Sot e gjithë Rumania është pranë tij duke shpresuar që situata të përmirësohet sa më shpejt. Ndërkohë Federata rumune e futbollit njoftoi mbrëmë zgjidhjen e kontratës me teknikun Lucescu, i cili, pavarësisht problemeve shëndetësore, dëshironte me forcë të qëndronte në pankinë me kombëtaren në ndeshjen play-off kundër Turqisë.
Lucescu kishte marrë drejtimin e kombëtares rumune në gusht të vitit 2024, duke pasuar Edward Iordănescu, nën drejtimin e të cilit “trengjyrëshat” kishin arritur deri në fazën e 1/8-ave të UEFA Euro 2024. Në 19 ndeshjet e mandatit të tij të dytë në krye të kombëtares rumune, Lucescu ka regjistruar 11 fitore, 1 barazim dhe 6 humbje. Tani, megjithatë, e gjithë vëmendja është përqendruar te gjendja e tij shëndetësore. Situata mbetet e vështirë dhe e ndërlikuar. Trajneri, që duhej të dilte nga spitali sot, mbetet i shtruar në pritje të zhvillimeve dhe përmirësimeve.
