Presidenti amerikan Donald Trump ka deklaruar për The Telegraph se po konsideron seriozisht të tërheqë SHBA-në nga NATO, pas refuzimit të aleatëve për t’u përfshirë në luftën e tij kundër Iranit.
Trump e përshkroi aleancën si një “tigër prej letre” dhe tha se largimi i Amerikës nga traktati i mbrojtjes është tashmë “jashtë diskutimit”.
Presidenti amerikan kritikoi veçanërisht Britaninë dhe Kryeministrin Keir Starmer, duke sugjeruar se Mbretëria e Bashkuar nuk ka flotën e nevojshme dhe nuk është e gatshme për t’u përfshirë në konflikt. “Ju nuk keni asnjë marinë të vërtetë. Jeni të vjetër dhe kamionët tuaj nuk funksionojnë,” tha ai.
Sipas Trump, NATO nuk ka mbështetur SHBA në përpjekjet për të rihapur Gjirin e Hormuzit, i cili është bllokuar nga Irani dhe ka rritur ndjeshëm çmimet globale të naftës dhe gazit. Ai theksoi se SHBA gjithmonë ka qenë e gatshme të mbrojë aleatët, por nuk ka marrë të njëjtën mbështetje në kthim.
Sekretari i Shtetit, Marco Rubio, akuzoi NATO-n si një “rrugë njëkahëshe”, duke kritikuar aleatët që nuk lejuan akses në bazat ushtarake amerikane. Trump e mbështeti këtë qëndrim dhe njoftoi se do të mbajë një fjalim për vendin të mërkurën në mbrëmje për të dhënë informacion mbi përparimin e luftës, e cila sipas tij mund të përfundojë brenda “dy deri në tre javë”.
Sipas mediave britanike, Trump po shqyrton gjithashtu tërheqjen e trupave amerikane nga Gjermania dhe një “model pagese” për NATO-n, që do të kufizonte pjesëmarrjen e aleatëve që nuk përmbushin kërkesat financiare të SHBA.
Ekspertët vënë në dukje se Artikulli 5 i NATO-s, që garanton mbrojtje të përbashkët në rast sulmi ndaj një anëtari, nuk do të aplikohet për luftën në Iran, e cila filloi me sulmet ajrore të përbashkëta amerikano-izraelite më 28 shkurt.
