Gazetarja amerikane Shelly Kittleson është rrëmbyer të martën në Bagdad të Irakut. Lajmi u konfirmua nga burimet dhe mediat e saj. Sipas CNN, qeveria amerikane po gjurmon rrëmbimin e saj dhe po punon me autoritetet irakiane për të siguruar lirimin e saj. Nuk është e qartë se kush është përgjegjës për rrëmbimin, por burimet thanë se gazetarja e pavarur ishte paralajmëruar me kërcënime kundër saj, përfshirë rrëmbimin, nga grupi iranian “Kataib Hezbollah”.
Ndihmës-sekretari amerikan i Shtetit, Dylan Johnson shkroi në një postim në X se "një person me lidhje me grupin “Kataib Hezbollah” dhe që besohet të jetë përfshirë në rrëmbim është vënë në paraburgim nga autoritetet irakiane".
“Kataib Hezbollah” është një grup milicie i mbështetur nga Irani dhe që ka goditur vazhdimisht amerikanët. Kittleson është një gazetare e specializuar në Lindjen e Mesme dhe Afganistan, me reportazhe të botuara në media ndërkombëtare, amerikane dhe italiane.
Sipas një burimi, qeveria amerikane e kishte paralajmëruar Kittleson së fundmi për një plan të “Kataib Hezbollah” për ta rrëmbyer ose vrarë atë. Paralajmërimi ishte bërë teksa ajo po raportonte nga Iraku.
Një burim tjetër tha se zyrtarët amerikanë dhe irakianë kishin nisur hetimet për rastin e Kittleson dhe e kishin paralajmëruar atë të largohej disa herë në javët e fundit.
“Departamenti i Shtetit e përmbushi që më parë detyrën për ta paralajmëruar këtë person për kërcënimet kundër saj dhe ne do të vazhdojmë të koordinohemi me FBI-në për të siguruar lirimin sa më shpejt të jetë e mundur", - tha Johnson të martën, pa dhënë detaje mbi kërcënimet.
“Al-Monitor”, një organizatë lajmesh me seli në SHBA, konfirmoi rrëmbimin e Kittleson dhe bëri thirrje për "lirimin e saj të sigurt dhe të menjëhershëm". “Al-Monitor” shkroi se ishte "thellësisht i alarmuar" nga rrëmbimi i Kittleson, e cila punon si kontribuese për këtë media.
Ministria e Brendshme e Irakut tha në një deklaratë se një gazetare e huaj u rrëmbye në qendër të Bagdadit nga individë të panjohur të martën në mbrëmje.
Forcat irakiane të sigurisë kapën një nga të dyshuarit dhe sekuestruan një nga automjetet e përdorura në rrëmbim. Forcat e sigurisë kanë nisur një operacion për të gjetur personat përgjegjës dhe për të siguruar lirimin e saj.
Ambasada e SHBA-së në Irak i ka paralajmëruar vazhdimisht qytetarët amerikanë të largohen nga vendi që kur filloi konflikti me Iranin në fund të shkurtit, duke paralajmëruar se milicitë e mbështetura nga Irani mund të përpiqen të rrëmbejnë amerikanët.
"Mos udhëtoni në Irak për asnjë arsye. Largohuni menjëherë nëse jeni atje", - tha ambasada në deklaratën e saj të fundit gjatë fundjavës. ©LAPSI.al
