Në Top Channel nuk ka ndodhur ndonjë devijim kushedi në vijën editoriale, por ka mjaftuar raportimi për debatet e brendshme në mbledhjet e Partisë Socialiste për të provokuar pakënaqësitë e para të kryeministrit Rama. Ai e ka quajtur të pabesueshëm raportimin e Top Channel në lidhje me kërcënimet që Rama ia drejtoi Elisa Spiropalit në mbledhjen e fundit të grupit parlamentar për ta "qepur" gojën në sy të tij.
Në Asamblenë e PS-së në Njësinë nr. 7 Tiranë, Rama i çoi një mesazh televizioneev që duhet ta ndalin raportimin e përpëlitjeve të deputetëve socialistë të pakënaqur nga vendimet e tij.
“Ishte spektakolare, ishte e pabesueshme edhe për mua që besoj që nuk ka më çfarë më surprizon, që ne mblidhemi në një mbledhje të zgjeruar të grupit parlamentar me qeverinë, gjë që kemi vendosur ta bëjmë çdo fund muaji, për të trajtuar tema specifike, për të dëgjuar qeveria deputetët, deputetët qeverinë, i kushtojmë orë të tëra çështjes së pronave, çështjes së shërbimit të kadastrës, problematikave në këtë shërbim, ecurisë së reformës në kadastër, shumë gjërave pozitive që janë bërë, shumë gjëra që duhen të vazhdojnë të bëhen, pastaj flasim për reformën administrative territoriale, ku bashkëkryetari prezanton gjithë analizën e të dhënave në këto muaj, të të dhënave, skenareve etj etj. Bëjmë nje sesion për temat e komunikimit dhe për këtë fushatë rreth partisë. Fillojmë në 11:00 dhe dalim në 6, dhe mediat kombëtare, nuk po diskutoj tenxheret e vogla apo ato të mbushura me helm që në mëngjes, por mediat kombëtare raportojnë për publikun çfarë i tha Edi Rama njërit dhe çfarë i tha Edi Rama tjetrit. Por shqetësimi nuk është ky, njerëzit kanë votuar dhe duan të dinë gjëra të tjera. Njerëzit janë të shqetësuar më të drejtë, siç janë të shqetësuar për çmimin e naftës", tha Rama.
Javët e fundit, në partinë socialiste janë dëgjuar disa zëra të zbehtë që kanë nxjerrë ndonjë pozicion ndryshe nga Rama, si për shembull Elisa Spiropali që u mërzit se e shkarkuan papritur nga ministria e jashtme dhe Erjon Braçe që po provon të vetëshpallet si kandidat për kandidat për kryetar bashkie. Por duke parë eksperiencën e gjatë që ka me atë që ka mbetur nga partia, Rama e di se zëra të tillë duhen fikur shpejt para se të kthehen në trend në radhët e vartësve të tij.
