SHBA ka njoftuar ditën e sotme hapjen e ambasadës amerikane në Venezuelë, shtatë vite pas mbylljes së saj dhe gati tre muaj pas arrestimit të presidentit Nicolás Maduro në një operacion ushtarak.
"Sot, ne po rifillojmë zyrtarisht punën e Ambasadës së Shteteve të Bashkuara në Karakas, duke shënuar një fazë të re në praninë tonë diplomatike në Venezuelë", njoftoi Departamenti i Shtetit.
Mediat shkruajnë se që nga arrestimi i Maduros, nënpresidentja Delcy Rodriguez ka shërbyer si presidente e përkohshme dhe ka qeverisur nën presionin e Uashingtonit, me Presidentin Donald Trump që shprehu interes të madh për rezervat e mëdha të naftës së vendit.
Në deklaratën e Departamentit të Shtetit, thuhet se rihapja e ambasadës së tyre në Karakas do të forcojë aftësinë e Uashingtonit për të punuar drejtpërdrejt me qeverinë e përkohshme të Venezuelës, shoqërinë civile dhe sektorin privat.
Departamenti amerikan i Shtetit sqaroi se shefja e misionit diplomatik amerikan, e ngarkuara me punë Laura Dogou, po mbikëqyr riparimet në ndërtesën e ambasadës "në mënyrë që të përgatitet, sa më shpejt të jetë e mundur, për kthimin e plotë të stafit dhe rifillimin e mëvonshëm të shërbimeve konsullore".
Shtetet e Bashkuara ndërprenë marrëdhëniet diplomatike me Karakasin në vitin 2019, menjëherë pasi vendosën se rizgjedhja e Nicolás Maduros ishte e paligjshme pas një zgjedhjeje që shihej gjerësisht si e dëmtuar nga mashtrimi. Që atëherë, misioni diplomatik amerikan në Venezuelë është vendosur në Kolumbinë fqinje.
