Deputeti i PS-së, Erion Braçe, deklaroi para parlamentit se vetëofrimi për të kandiduar për Bashkinë e Tiranës nuk lidhet me ambicie personale. Duke iu përgjigjur pyetjeve të gazetarëve nëse do të kandidojë, ai tha se “gjërat që thuhen në shtëpi mbeten në shtëpi”.
“Gjërat që thuhen në shtëpi mbeten aty. Nuk bëhet fjalë për ambicie personale. Po të ishte për personale, nuk do të kishte fare vlerë. Unë kam folur brenda Asamblesë së PS-së dhe aty mbetet,” shtoi Braçe.
Në takimin e Asamblesë së PS në njësinë numër 5 mbajtur mbrëmjen e së shtunës, deputeti Erion Braçe u vetëofrua për të kandiduar për bashkinë e Tiranës në zgjedhjet vendore që do të mbahen vitin e ardhshëm.
Ky qendrim i Braçes vjen në një kohë kur Edi Rama ka shpallur kandidaten e Partisë Socialiste, Ogerta Manastirliu në vjeshtën e vitit të shkuar kur u shpallën zgjedhje të parakohëshme për Tiranën, por që më pas u anuluan nga Gjykata Kushtetuese.
Deri tani Braçe ka luajtur rolin e të pakënaqurit brenda radhëve të partisë, duke u ankuar për ndonjë parkim të zënë në rrugët e Tiranës, për çmimet e larta të karburanteve etj, por gjithnjë dukë bërë sikur nuk e sheh elefantin në dhomë; korrupsionin që ekziston në administratën socialiste nga këmbët te koka e organizatës.
