Një gjykatë në Kaliforni ka shpallur përgjegjëse kompaninë “Meta” dhe YouTube për të gjitha akuzat në një vendim historik për mediat sociale. Sipas vendimit, “platformat ishin projektuar në një mënyrë që ço në varësinë e një përdorueseje të re dhe përkeqësimin e shëndetit të saj” mendor.
Juria arriti në përfundimin se të dyja kompanitë ishin neglizhente në hartimin e shërbimeve, dinin për rreziqet e mundshme që përfshinte përdorimi i tyre dhe nuk arritën të paralajmëronin në mënyrë të mjaftueshme për to, duke i shkaktuar paditëses dëme të konsiderueshme.
Vendimi ka të ngjarë të krijojë një precedent për qindra raste të ngjashme dhe mund të sjellë ndryshime në mënyrën se si funksionojnë mediat sociale, veçanërisht kur bëhet fjalë për mbrojtjen e të miturve.
Kaylee, tashmë 20 vjeçe, së bashku me nënën e saj, paditën Meta, YouTube, Snap dhe TikTok, duke pretenduar se platformat e tërhoqën atë sistematikisht në një moshë të re, duke bërë që ajo të përjetonte ankth dhe ide vetëvrasëse. Snap dhe TikTok arritën një marrëveshje para se të fillonte gjyqi.
Çështja arriti deri në Gjykatën e Lartë të Los Anxhelosit ku zgjati 7 javë. Juria e shqyrtoi çështjen për më shumë se tetë ditë për të arritur në një vendim. Meta dhe YouTube urdhërohen të paguajnë një total prej 3 milionë dollarësh në dëmshpërblim, ndërsa pritet të vendoset në një fazë të mëvonshme nëse do të vendosen dëmshpërblime shtesë ndëshkuese, duke marrë parasysh gjendjen financiare të kompanive.
Juria e gjeti “Meta” fajtore për 70% dhe YouTube për 30%. Paditësja ishte e pranishme në dhënien e vendimit në gjykatë, së bashku me prindërit e të miturve të tjerë, të cilët thonë se janë prekur negativisht nga përdorimi i mediave sociale.
Një zëdhënës i Meta tha se kompania nuk është dakord me vendimin dhe po shqyrton mundësitë e saj ligjore, ndërsa Google tha se planifikon të apelojë. Në një deklaratë, kompania argumentoi se YouTube është një platformë e ofrimit të përmbajtjes e projektuar me përgjegjësi dhe jo një platformë e mediave sociale.
Të dy kompanitë i kishin mohuar akuzat, duke thënë se kanë miratuar mjete sigurie për të miturit, të tilla si kontrollet prindërore dhe kufizimet e përmbajtjes dhe privatësisë për adoleshentët. ©LAPSI.al
