Humbja në referendumin për reformën në drejtësi ka shkaktuar tërmet në qeverinë e Kryeministres Giorgia Meloni. Efekti i parë, pas humbjes në referendum, ishin një sërë dorëheqjesh. Përveç dorëheqjes së Andrea Delmastro Delle Vedove nga posti i Nënsekretarit të Drejtësisë, dha dorëheqjen edhe Giusi Bartolozzi, shefe e kabinetit të Ministrit të Drejtësisë, pas polemikave për deklaratat e saj ndaj magjistratëve.
Ndërkohë, edhe Ministrja e Turizmit Daniela Santanché është në rrezik, pasi është nën presion për hetime që lidhen me aktivitetet e kompanisë së saj dhe menaxhimin e saj gjatë pandemisë. Sipas mediave italiane, këto zhvillime vijnë pas takimeve të Melonit me drejtues të Fratelli d’Italia gjatë gjithë mëngjesit, me synimin për të dhënë një përgjigje të fortë politike pas rezultatit të referendumit.
"Sot paraqita dorëheqjen time të parevokueshme si Nënsekretar i Drejtësisë. Gjithmonë kam luftuar krimin, duke arritur rezultate konkrete dhe domethënëse, dhe ndërsa nuk kam bërë asgjë të gabuar, kam kryer një akt të pamatur që e korrigjova sapo u bëra i vetëdijshëm për të. Marr përgjegjësinë për këtë, në interes të kombit, madje edhe më shumë nga dashuria dhe respekti që kam për qeverinë dhe Kryeministrin", tha Delmastro pas lajmit të dorëheqjes së tij.
Bartolozzi ishte në qendër të një polemike për shkak se tha gjatë një interviste në stacionin televiziv siçilian Telecolor se nëse vota 'po' fiton, qeveria do t'i heq qafe magjistratët.
Nënsekretari ka qenë në qendër të vëmendjes për çështjen "Bisteccheria d'Italia" për ditë të tëra, në të cilën ai ishte partner me vajzën tetëmbëdhjetëvjeçare të Mauro Caroccia, i dënuar me katër vjet burg për regjistrim fiktiv të aseteve që i përkisnin klanit të udhëhequr nga Michele Senese, me nofkën 'o pazzo'.
Sa i përket ministres, ajo ka qenë nën hetim për punët dhe borxhet e kompanisë së saj Visibilia dhe për shkurtimin e vendeve të punës që kërkoi gjatë pandemisë Covid.
