Kryeministri i Izraelit, Benjamin Netanyahu ka njoftuar se ka zhvilluar një bisedë telefonike me Presidentin e SHBA-së Donald Trump, lidhur me mundësinë e arritjes së një marrëveshjeje me Iranin.
Në reagimin e tij të parë që kur Trump njoftoi se po zhvillonte bisedime me Iranin për t'i dhënë fund luftës, Netanyahu tha se Izraeli do të mbrojë interesat e tij jetësore në çdo situatë. Sipas liderit izraelit, Trump beson se arritjet e luftës mund të shfrytëzohen në një marrëveshje me Teheranin.
“Trump beson se ekziston një shans për të shfrytëzuar arritjet masive të IDF-së dhe ushtrisë amerikane në mënyrë që të arrihen qëllimet e luftës përmes një marrëveshjeje - një marrëveshje që mbron interesat tona jetësore”, shprehet ai.
Në një deklaratë video të publikuar nga zyra e tij, Netanyahu tha gjithashtu se Izraeli po vazhdonte sulmet ndaj Iranit dhe Hezbollahut në Liban.
“Ne po e shkatërrojmë programin e raketave dhe programin bërthamor, dhe po vazhdojmë ta godasim fuqishëm Hezbollahun. Vetëm disa ditë më parë, eliminuam dy shkencëtarë të tjerë bërthamorë, dhe krahu ynë është ende i shtrirë”, u shpreh Netanyahu.
