Elbasani dhe Egnatia nuk shkuan më shumë se një barazim 0-0 në takimin e javës së 29-të të Abissnet Superiores, në stadiumin “Elbasan Arena”.
Ndeshja kishte ritëm dhe raste nga të dyja skuadrat, por mungoi konkretizimi para portës. Pavarësisht tentativave të shumta, rrjetat mbetën të paprekura deri në vërshëllimën finale.
Ndeshja u shoqërua edhe me tension, ku arbitri nxori dy kartonë të kuq. I pari erdhi shumë herët, në minutën e 7-të për Boye të Elbasanit. Ndërsa në minutën e 29-të ishte radha e Flamur Ruçit të Egnatias të largohej nga fusha.
Pas këtij rezultati, Elbasani ngjitet përkohësisht në krye të renditjes me 53 pikë, një më shumë se Vllaznia që ka një ndeshje më pak. Egnatia, nga ana tjetër, mbetet në vendin e tretë me 51 pikë.
Gvozdenoviç: Ishim më pranë golit, por nuk mjafton një pikë
Trajneri i Elbasanit, Ivan Gvozdenoviç, u shpreh pas 0-0 ndaj Egnatias se skuadra e tij ishte më afër fitores, pavarësisht se nuk konkretizoi rastet. Ai e cilësoi sfidën si një “ndeshje shahu”. Sipas tij Elbasani krijoi më shumë mundësi, veçanërisht me Lajthinë dhe Mustën, por mungoi finalizimi. Tekniku serb tha se kartoni i kuq ndikoi në rrjedhën e lojës. Ai shtoi se strategjia ishte të goditej me shpejtësi në sulm dhe të ruhej ekuilibri në mbrojtje. Në pjesën e dytë, ekipi tentoi presing të lartë dhe sulme nga krahët, duke rrezikuar më shumë për të marrë fitoren. Gvozdenoviç vlerësoi gjithashtu kontributin e lojtarëve dhe theksoi rëndësinë e tifozëve. Ai e cilësoi atmosferën në stadium si shumë pozitive, ndërsa në fund pranoi se një pikë mbetet zhgënjyese për objektivat e skuadrës.
