Pas vitesh besnikërie ndaj regjimit të Putinit, Ilya Remeslo po kalon në anën tjetër. Avokati akuzon presidentin rus për një "luftë të dështuar" në Ukrainë, duke kërkuar dorëheqjen dhe gjykimin e tij si kriminel lufte.
42-vjeçari ka "kaluar" shumë vite të jetës së tij duke sulmuar kritikët e regjimit dhe duke shpifur për gazetarë, blogerë dhe politikanë të pavarur të opozitës. Megjithatë, vonë të martën në mbrëmje, siç shkruan gazeta britanike The Guardian, Remeslo publikoi në Telegram një “manifest” të titulluar: "5 arsye pse ndalova së mbështeturi Vladimir Putinin".
Ai akuzon presidentin “e paligjshëm” rus se po vijon një “luftë të dështuar” në Ukrainë, e cila ka shkaktuar miliona viktima dhe ka shkatërruar ekonominë e vendit. Ai argumenton se qëndrimi i Putinit në pushtet për më shumë se 20 vjet vërteton se “pushteti absolut të korrupton”, duke bërë thirrje që ai të japë dorëheqjen.
Shumë veta tani po pyesin veten nëse kjo kthesë është e vërtetë. Duke folur për The Guardian nga apartamenti i tij në Shën Petersburg, ai thotë: “Vladimir Putin duhet të japë dorëheqjen dhe të gjykohet si kriminel lufte. Sistemi i tij personal dhe i korruptuar është i dënuar të shembet, siç po e shohim tani me luftën në Ukrainë dhe gjetkë.”
Ai fajësoi Putinin për regjimin autoritar, gjendjen e dobët të ekonomisë dhe përpjekjet e fundit të Moskës për të kufizuar aksesin në internet. "Ky njeri ka shkatërruar gjithçka që mund të prekte. Fjalë për fjalë vendi po shembet", tha ai.
Kritikat e ashpra të Remeslos ndaj Putinit mbeten jashtëzakonisht të rralla, duke pasur parasysh se komuniteti "mbështetës i luftës" i Rusisë ka kritikuar ndonjëherë udhëheqjen ushtarake të vendit, por shumë pak e kanë vënë hapur në pikëpyetje vetë Putinin. Remeslo, një ish-anëtar i Dhomës Publike të Rusisë i njohur për sulmet e tij ndaj kritikëve të regjimit, veçanërisht Alexei Navalny, është i habitshëm në përmbysjen e tij.
Kthimi i Remeslos shkaktoi menjëherë spekulime. Disa sugjeruan fillimisht se llogaria e tij mund të jetë hakuar, një teori që u hodh poshtë shpejt kur ai postoi një video duke përsëritur qëndrimet e tij. Remeslo tha se "asgjë nga kjo nuk është e rreme. Unë thjesht po them të vërtetën" dhe mohoi se ishte udhëhequr nga dikush, duke shtuar: "Njerëzit e mbivlerësojnë administratën aktuale. Ata nuk do të mendonin për diçka të tillë."
Remeslo shpjegoi se vendimi për të folur erdhi gradualisht, derisa ai nuk mund të heshtte më. "Putini nuk është më “njëri prej nesh”. Ai është një person, interesat e të cilit janë të huaja si për Rusinë ashtu edhe për mua personalisht."
Ndërsa opozita ruse dukej e painteresuar. Leonid Volkov, një bashkëpunëtor i ngushtë i Navalny, supozoi fillimisht se incidenti ishte “i inskenuar”, por më vonë pranoi seriozitetin e çështjes, duke deklaruar se komentet shkuan përtej çdo miratimi apo udhëzimi të Kremlinit.
Remeslo, i vetëdijshëm se mund të përballet me ndjekje penale për komentet e tij, u shpreh: “Jam gati për çdo gjyq kundër meje. Është koha për të thyer këtë rreth vicioz dhe për të folur hapur. Mbaj një pjesë të përgjegjësisë si dikush që e ka mbështetur prej kohësh këtë regjim dhe e ka ndihmuar atë të mbijetojë.” ©LAPSI.al
