Ndoshta pas fitores 6-1 në ndeshjen e parë në portë mund të vendosin edhe një karrige, por Bayern Munich praktikisht është pa portierë për ndeshjen e kthimit të 1/8-ave të UEFA Champions League kundër Atalantës. Manuel Neuer dhe Sven Ulreich (përkatësisht i pari dhe i treti në hierarki) janë jashtë për shkak dëmtimi, Jonas Urbig (i dyti) është në dyshim shumë të madh dhe edhe 18-vjeçari Leon Klanac, portier i ekipit të dytë të bavarezëve dhe teknikisht i katërti në skuadër, ka një problem muskulor.
Po atëherë? Atëherë Vincent Kompany do të hedhë nga minuta e parë Leonard Prescott, 16-vjeçarin që zakonisht mbron portën e ekipeve të moshave dhe që kundër bergamaskëve do të bëjë debutimin e tij absolut mes profesionistëve.
Kush është Prescott
I lindur në New York City dhe i rritur në Berlin (ka pasaportë të dyfishtë gjermane dhe amerikane), portieri 196 centimetra i gjatë i kombëtares gjermane U17 ka ardhur te Bayern në vitin 2023 nga 1. FC Union Berlin dhe që nga maji i kaluar stërvitet me ekipin e parë, ku trajnerët e portierëve Michael Rechner dhe Andreas Rössl e vlerësojnë shumë për refleksin në portë dhe për aftësinë me topin në këmbë, aq sa trajneri i ekipit të të rinjve të bavarezëve për të thotë se “teknikisht është aq i mirë sa mund të luajë edhe në mesfushë”.
Nëse kundër Atalantës do të jetë radha e tij (natyrisht do të luajë në portë…), përveçse do të bëjë debutimin mes profesionistëve në një ndeshje të 1/8-ave të Champions League – gjë që nuk i ndodh kujtdo – ai do të hyjë edhe në historinë e Bayern, sepse lojtari i lindur në 2009 do të bëhej futbollisti i dytë më i ri në histori që debuton me klubin bavarez pas Paul Wanner (anësori austriak, sot 20 vjeç, që në vitin 2022 hyri si zëvendësues në një ndeshje të Bundesliga në moshën 16 vjeç e 15 ditë).
