Udhëheqësi i ri Suprem i Iranit, Mojtaba Khamenei, i plagosur, është dërguar me urgjencë në Moskë për një ndërhyrje kirurgjikale në këmbë. Lajmin e jep Daily Mail që citon media kuvajtiane.
Mojtaba Khamenei, 56 vjeç, pasoi të atin, Ajatollah Ali Khamenei, pas vrasjes së tij më 28 shkurt. Sipas të njëjtave burime, Khamenei thuhet se ishte në koma në Spitalin Universitar Sina të Teheranit pas sulmit ajror amerikan dhe izraelit që shënjestroi udhëheqjen e vendit.
Lëndimet e tij bënë të nevojshëm transferimin e tij në Rusi për një ndërhyrje kirurgjikale "të ofruar personalisht nga Putini", sipas agjencisë së lajmeve Al-Jarida. Daily Mail vëren gjithashtu se misioni për të nxjerrë Ajatollahun e ri nga vendi ishte menduar të mbetej sekret dhe përfshinte hipjen e tij në një avion ushtarak rus.
Ai është mbajtur në një nga pallatet presidenciale të Vladimir Putinit, ku iu nënshtrua një ndërhyrjeje kirurgjikale “të suksesshme”. Lajmi mbetet i pakonfirmuar, por Al-Jarida pretendon se e ka marrë informacionin nga një “burim i lartë pranë udhëheqësit të ri suprem të Iranit”.
Një burim i veçantë i tha gazetës “The Sun” nëpërmjet mesazheve sekrete të dërguara një disidenti në mërgim që jetonte në Londër se Mojtaba Khamenei ishte plagosur rëndë në sulm dhe i ishin prerë të dyja këmbët.
Të premten, Sekretari i Mbrojtjes i SHBA-së, Pete Hegseth, tha gjatë një informimi në Pentagon se "Mojtaba Khamenei është i plagosur, ndoshta është i shpërfytyruar".
"Ne e dimë që udhëheqësi i ri, i ashtuquajtur, jo aq suprem, është i plagosur dhe ndoshta është i shpërfytyruar", - tha Hegseth. Ai shtoi se udhëheqësit e Iranit "po fshihen si minj".
"Nuk pati zë dhe nuk pati video. Ishte një deklaratë e shkruar", tha ai. "Irani ka shumë kamera dhe shumë regjistrues zëri. Pse një deklaratë e shkruar? Mendoj se e dini pse", - vuri në dukje ai, duke komentuar fjalimin e parë të bërë nga Mojtaba Khamenei përmes një teksti të shkruar të lexuar nga televizioni shtetëror iranian. ©LAPSI.al
