Farooq Abdullah, 88 vjeç, ish-kryeministri i Kashmirit të kontrolluar nga India dhe president i Konferencës Kombëtare të Jammu dhe Kashmirit, i mbijetoi një atentati në një dasmë. Pamjet e kamerave të sigurisë fiksuan një burrë që hapi zjarr nga afër, por pa e lënduar politikanin.
Policia e identifikoi të dyshuarin si Kamal Singh Jamwal, i cili u arrestua në vendngjarje. Sipas mediave indiane, Kamal tha se e kishte pritur këtë moment për 20 vjet dhe nuk tregoi asnjë pendim.
Djali i Abdullahut, Omar Abdullah, kryeministri aktual i rajonit, e konfirmoi incidentin përmes një postimi në rrjetet sociale dhe tha se babai i tij shpëtoi “për një fije floku” dhe pyeste veten se si dikush mund t’i afrohej një politikani që kishte një nga nivelet më të larta të mbrojtjes në vend.
Gjatë sulmit, Farooq Abdullah shoqërohej nga Zëvendëskryeministri Surinder Kumar Choudhary dhe Këshilltari Nasir Sogami, i cili tha se askush nuk u lëndua. Policia po vazhdon të hetojë motivin e sulmuesit, ndërsa thuhet se Kamal ka pasur një motiv personal për sulmin. ©LAPSI.al
