Një sërë seancash gjyqësore janë shtyrë këtë javë në Gjykatën e Posaçme pasi gjyqtarja Engjëllushe Tahiri ndodhet prej disa ditësh në Dubai, ku është bllokuar për shkak të pezullimit të fluturimeve nga lufta në Lindjen e Mesme.
Ditën e sotme janë shtyrë 3 seanca, mes tyre edhe ajo e 'Plumbit të Artë'. Anëtari i trupës gjykuese Besmir Stroka tha se seanca radhës do të mbahet në datë 10 mars ora 10.00.
Mediat raportojnë se Tahiri ndodhej në Dubai për arsye turistike. Prej vitesh Dubai është shndërruar në një prej destinacioneve më të vizituara turistike, por edhe një prej vendeve më të preferuara të drejtuesve të grupeve kriminale, të cilët përfitojnë nga fakti që Shqipëria nuk ka një marrëveshje ekstradimi me Emiratet e Bashkuara.
