Në gjyqin ndaj anëtarëve të grupit kriminal të Laert Haxhiu, para gjykatës kanë dëshmuar disa shtetas të thirrur nga prokuroria lidhur me ngjarje të ndryshme kriminale, mes tyre edhe vrasja e Çajup Selimi, e ndodhur më 1 qershor 2021.
Dëshmitar në seancë ishte babai i Erisiano dhe Bujar Abedini, të dyshuar si pjesëmarrës në vrasje
Dëshmitari: Jam në dijeni të ngjarjes. Kam pasur nënën në spital kishte 20 ditë në spital dhe me datën 12 ndërroi jetë.
Unë dhe vellai Bujari e vizitonim. Unë në atë kohe punoja me materiale ndërtimi në Tepelenë. Tek punonte nusja te dyqani.
Çajup Selimi shiste çemento afër dyqanit tonë. Me Çajupin kemi pasur probleme se i bënte telefon nuses time në çdo orë të ditës e të natës. Kemi pasur probleme se edhe me djalin tim janë rrahur.
E pata marr vesh rreth 2 vite para vrasjes. Ai e pranonte se e telefononte gruan.
Çajupi i dërgonte mesazhe edhe e përndiqte. Gruaja i thoshte mos i bjer më telefonit dhe mos shkruaj më.
Banesa ime ndodhet me kat të 2 se katin e parë e kisha biznesin. Vëllai im Bujari nuk ka qenë në dijeni.
Në Ksamil kemi një hotel, pata investur unë bashkë me familjen. Më ka ndihmuar edhe motra dhe kam marrë kredi.
Në orën 12 të asaj nate mora vesh se kanë vrarë Çajupin. Kur shkova në polici e mora vesh. Djali im ishte në Tiranë se nusja e tij kishte probleme dhe ai ka ardhur në Tepelenë pas disa ditësh. Nuk i shkova në varrim Çajupit se isha në polici.
