Jim Carrey është detyruar të reagojë pas spekulimeve në rrjet se në ceremoninë e César Awards nuk kishte qenë ai personalisht, por një “klon” apo imitues.
Përfaqësuesja e tij, Marleah Leslie, deklaroi për Page Six se aktori mori pjesë vetë në ceremoninë ku u nderua me çmimin Honorary César.
Edhe Gregory Caulier, delegati i përgjithshëm i Çmimeve César, hodhi poshtë pretendimet, duke e quajtur praninë e Carrey-t “një moment historik”.
“Vizita e Jim Carrey-t ishte planifikuar që prej verës. Ai ishte jashtëzakonisht i prekur nga ftesa e Akademisë,” tha Caulier për Variety.
Sipas tij, aktori kishte punuar për muaj të tërë për fjalimin në frëngjisht dhe kishte marrë pjesë në ceremoni i shoqëruar nga partnerja, vajza, nipi dhe miq të ngushtë. Në sallë ishte gjithashtu edhe miku i tij i vjetër, regjisori francez Michel Gondry.
Spekulimet nisën pasi fansat komentuan pamjen “ndryshe” të aktorit 64-vjeçar, duke pretenduar se ai kishte bërë ndërhyrje estetike apo madje ishte “klonuar”.
“Askush s’mund të më bindë që nuk e kanë klonuar Jim Carrey-n,” shkroi një përdorues në rrjetin X.
Të tjerë aluduan për operacione plastike duke krahasuar pamjen e tij me rolet ikonike si në filmin Dumb and Dumber.
Zërat u shtuan edhe më shumë pasi make up artisti, Alexis Stone publikoi në Instagram imazhe të një maske hiper-realiste që i ngjante fytyrës së Carrey-t, duke bërë shaka se kishte zënë vendin e tij në ceremoni.
Në rrjet qarkulloi edhe një video e vjetër ku aktori shprehej se “nuk ekziston”, duke thënë se edhe “Jim Carrey” është një personazh i krijuar prej tij.
Carrey ishte tërhequr nga aktrimi në fund të viteve 2010 dhe kishte deklaruar për The Hollywood Reporter se nuk dëshironte më të ishte pjesë e industrisë së filmit.
Megjithatë, ai u rikthye në ekran për filmin Sonic the Hedgehog 3, i cili u publikua në vitin 2024.
