Në orët e fundit në detyrë, Ministri i Mbrojtjes Pirro Vengu ka marrë një ngushëllim nga ambasada amerikane në Tiranë sa për ta balancuar disi shijen e hidhur të shkarkimit të papritur që i bëri kryeministri Edi Rama në mbledhjen e grupit parlamentar. Gjatë ceremonisë së dorëzimit të raketave Javelin në Zallherr, e ngarkuara me punë e ambasadës Nancy VanHorn i rezervoi një vlerësim të veçantë ministrit riosh, të cilin e quajti një partner të ngushtë të ambasadës.
“Dua të them që jemi të lumtur që të kemi këtu ministrin që ka qenë një partner i fortë i Shteteve të Bashkuara” u shpreh VanHorn e ndërgjegjshme që këto ditë, Vengu është duke u marrë me paketimin e sendeve të tij personale për të dorëzuar zyrën tek një i besuar i afërt i Belinda Ballukut.
Nuk dihet nëse ky partneritet kaq i ngushtë me ambasadën është bërë shkas për largimin e Pirro Vengut nga detyra, por gjithsesi nuk do të ishte i pari. Pëshpëritjet në ambasadë i hëngrën kokën disa vite më parë ish drejtorit të policisë, Gledis Nano, që gjithnjë ishte parë me dyshim nga Rama për afërsinë që kishte me "rrugën e Elbasanit".
Off the record/ Fjalët e Ramës në “funeralin politik” të Ballukut
Më herët, Lapsi.al raportoi se në diskutimet me dyer të mbyllura me deputetët socialistë, Rama foli me përbuzje të dukshme ndaj të vetëve që i japin më shumë gojës nëpër ambasada e diplomatë. Këtë kategori Rama e cilësoi si “deputetë anglishtfolës”./ Lapsi.al
