Politikani i majtë dhe ish-ministri i Financave të Greqisë, Yanis Varoufakis, është vënë nën akuzë dhe do të dalë në gjyq me pretendimin se ka promovuar përdorimin e drogës në një podcast, njoftoi të mërkurën partia e tij e vogël MeRA25.
Në një deklaratë zyrtare, partia bëri të ditur se Varoufakis pritet të paraqitet në gjykatë më 16 dhjetor, ndërsa akuzoi qeverinë e qendrës së djathtë në Athinë për “manipulim” të sistemit të drejtësisë me qëllim goditjen e tij “sepse ai thotë të vërtetën”.
Hetimi ndaj Varoufakis u hap pas komenteve të bëra në një podcast mbi çështje që lidhen me të rinjtë, ku ai u pyet nëse kishte përdorur ndonjëherë drogë.
“Nuk doja të bëja si Bill Clinton (kujtoni "Nuk e thitha tymin" qesharake?), ndaj thashë që po”, shkroi ai më vonë në platformën X. Varoufakis pranoi se kishte përdorur marijuanë në të kaluarën dhe përmendi një eksperiencë të vetme me ekstazi në Sydney, 36 vite më parë. Ai shtoi se fillimisht përvoja kishte qenë e këndshme, por i kishte shkaktuar një migrenë njëjavore, çka e kishte dekurajuar të përdorte sërish drogë.
Sipas tij, kjo histori personale u përdor për të theksuar rreziqet e konsumimit të lëndëve narkotike. Ai u tha dëgjuesve se “ka një çmim për të paguar”, ndërsa varësinë e përshkroi si “fundin e lirisë”.
Partia MeRA25 e cilësoi vendimin për ta çuar Varoufakis në gjyq si “qesharak … dhe të rrezikshëm”. “Ideja për të vënë në bankën e të akuzuarve një lider partie për të folur mbi eksperienca me substanca shumë dekada më parë nuk është një gafë e pafajshme,” thuhet në deklaratë. “Është një mesazh nga një drejtësi që mbyll sytë përballë atyre në pushtet dhe godet këdo që refuzon të përkulet.”
MeRA25 aktualisht nuk ka përfaqësim në Parlamentin grek.
Kush është Yanis Varoufakis?
Yanis Varoufakis është një ekonomist dhe politikan grek, i njohur ndërkombëtarisht për rolin e tij si ministër i Financave i Greqisë në vitin 2015, në kulmin e krizës së borxhit grek. Si pjesë e qeverisë së udhëhequr nga Alexis Tsipras dhe partia SYRIZA, ai u bë figura kryesore e negociatave të ashpra me Bashkimin Europian dhe Fondin Monetar Ndërkombëtar për paketat e shpëtimit financiar.
I njohur për stilin e tij të drejtpërdrejtë dhe shpesh provokues, Varoufakis dha dorëheqjen në korrik 2015 pas referendumit grek mbi kushtet e marrëveshjes me kreditorët. Më pas themeloi partinë MeRA25 dhe u pozicionua si kritik i ashpër i politikave të shtrënguara fiskale dhe i establishmentit europian.
Në diskursin politik europian, ai konsiderohet një figurë polemike, që përkrah sovranitetin demokratik përballë institucioneve financiare ndërkombëtare dhe mbron një qasje më sociale ndaj ekonomisë.
