Kreu i grupit parlamentar demokrat, Gazmend Bardhi ka reaguar në rrjetet sociale lidhur me postimin e kryeministrit Rama ku krahasonte shembjen e rrugëve në Shqipëri me një situatë të ngjashme që ka ndodhur edhe në Portugali.
Bardhi nuk shikon ngjashmëri këtu, pasi Portugalia pati ciklon me 200 km/orë, ndërsa tek ne kishte vetëm reshje sezonale, pas të cilave fshihet Rama duke mos mbajtur përgjegjësi për shembjen e rrugëve.
Nga ana tjetër Bardhi i jep një këshillë Ramës, që nga Portugalia të marrë si shembull rastet kur jepet dorëheqja.
Reagimi i Bardhit:
Rrugët në Shqipëri nuk po i shemb shiu. Po i shemb korrupsioni. Përpjekja e Edi Ramës për t’u fshehur pas reshjeve sezonale është fyese për shqiptarët.
Në Portugali pati ciklon 200 km/orë. Tek ne ka tornado korrupsioni: vetëm në 11 tendera nën hetim nga SPAK, janë 1.1 miliardë euro, të hedhura në rrugë.
Pamjet nuk kanë nevojë për koment. ?
P.S. Një këshillë falas per Edi Ramën: nga Portugalia mëso si jep dorëheqjen kryeministri dhe ministrat kur janë nën hetim. Antonio Kosta është vetëm një telefonatë larg!
Reagimi i mëparshëm i kryeministrit Rama në X:
Çudi e madhe, në Portugali ka ndodhur kjo nga të njëjtat fenomene, po s’po e marr vesh se mirë opozita portugeze është në gjumë, mirë edhe ato pak tenxhere mediatike të Portugalisë janë me temperaturë të ulët e s’ka vend për gjithë këtë rrugë të re, po si ka mundësi që opozitat e këtushme nuk e kanë denoncuar akoma në SPAK këtë vepër të korrupsionit dhe si është e mundur që 700 tenxheret e flakta të mexhelisit tonë mediatik, nuk kanë thirrur gjithollogët e tyre që të jashtënxjerrin faktet e tmerrshme që fshihen nën asfaltin e këtij korrupsioni qeveritar, ku padyshim është dora e narkoshtetit shqiptar!
