“Edhe nëse do të dilnim, aspektin e bilancit do ta rregullonim gjatë rrugës. Nuk është absolutisht problem”. Kështu ishte shprehur Beppe Marotta, president i Interit, pak para fishkëllimës së fillimit të sfidës së play-off të Champions, më pas të humbur nga zikaltërit kundër Bodo/Glimt që në fakt eliminuan nga kompeticioni skuadrën e teknikut Chivu. Çështja ekonomike nuk është kurrë banale kur flitet për Interin, duke pasur parasysh çfarë ka ndodhur në vitet e fundit mes krizave shoqërore dhe ndryshimeve të pronësisë të pashmangshme.
Sot Inter operon në mënyrë të kujdesshme, pa e përmbysur shumë skuadrën në merkato, me rregullime të vogla dhe investime strategjike sidomos te të rinjtë. Bërthama e skuadrës është pak a shumë e njëjta, edhe pse tani duhet bërë një reflektim. “Ta rregullojmë gjatë rrugës” për presidentin Marotta do të thotë në mënyrë të pashmangshme të shitet dikush me një çmim më të lartë se ai i blerjes: plusvalencë. Dhe kjo të çon patjetër te emri i Marcus Thuram, që ka treg ndërkombëtar dhe që mund të jetë i pari i sakrifikuar nga Inter në merkaton e ardhshme.
Lexo më tej: Inter, lamtumirë Champions. Bodø/Glimt e turpëron edhe në San Siro: të kualifikuarit
Një mega plusvalencë e mundshme me Thuram, një lojtar që sigurisht ka treg ndërkombëtar, mund të jetë përgjigjja më logjike në këtë moment për Interin, që me eliminimin nga Champions humbet 11 milionë të garantuara nga kalimi i munguar në të tetat, dhe mesatarisht 9 milionë që do të vinin nga të ardhurat e biletarisë. Një total prej 20 milionësh që duhet patjetër të rikthehen në arkat zikaltër dhe që vetëm merkatoja në këtë moment mund ta garantojë.
Thuram është i dyshuari numër një sidomos duke pasur parasysh se këtë sezon shpërthimi i sulmuesit Pio Esposito, por edhe rendimenti i mirë i Bonny, mund ta kenë bindur klubin se reparti ofensiv tashmë konsiderohet i mbuluar. Përveç sulmuesit francez, mbeten gjithmonë për t’u konsideruar në dalje lojtarë që kanë pasur treg edhe më parë si Frattesi, por edhe vetë Calhanoglu që verën e kaluar ishte protagonist i çështjes Galatasaray. Me pak fjalë, nga merkatoja do të duhet të vijnë burimet e nevojshme për të mbushur boshllëkun ekonomik që është krijuar me daljen e parakohshme nga skena të zikaltërve në Champions.
