Në kohën kur kanë mbetur më pak se dhjetë ditë për zgjedhjen e presidentit ose presidentes së Kosovës sipas afateve kushtetuese, kryeministri Albin Kurti, ka pritur në takim kryetarin e PDK-së dhe deputetin e Kuvendit, Bedri Hamza.
Kryeministri Kurti falënderoi liderin e opozitës për bashkëpunimin e mëparshëm në votimin e marrëveshjeve ndërkombëtare, ndërsa Hamza shprehu gatishmërinë për koordinim parlamentar për çështje të interesit shtetëror dhe kombëtar.
“Gjatë takimit u diskutua nevoja për bashkëpunim mes deputetëve për të siguruar votim të suksesshëm, duke pasur parasysh se nevojiten së paku 2/3 e votave të Kuvendit në seancë,” thuhet në njoftim.
Sipas Kryeministrisë, Hamza ka theksuar gatishmërinë për koordinim parlamentar për çështje të interesit shtetëror dhe kombëtar.
“U diskutua gjithashtu për zhvillimet politike në vend dhe më gjerë, si dhe për nevojën për të hapur një kapitull të ri të komunikimit dhe dialogut konstruktiv mes qeverisë dhe opozitës, në të mirë të Republikës sonë dhe pluralizmit partiak e demokratik. Natyrisht, temë e bisedës ishte edhe çështja e zgjedhjes së Presidentit, për të cilën kanë mbetur vetëm 10 ditë sipas afateve kushtetuese”, thuhet në njoftimin e lëshuar nga Zyra e Kreministrit.
Kryeministri Kurti të hënën më 23 shkurt, do të takohet me kryetarin e LDK-së, Lumir Abdixhiku, për të vazhduar koordinimin parlamentar./ RTK
