Skuadra e Teutës ka triumfuar ndaj Tiranës me rezultatin 0-1, në takimin e vlefshëm për javën e 25-të të Superiores, i luajtur në “Selman Stërmasi”.
Pjesa e parë i përkiste më shumë Tiranës, ku Tabeku pati rastin më të mirë për të zhbllokuar ndeshjen. Por në pjesën e dytë, Teuta e trajnerit Enkelejd Dobi dominoi lojën, duke treguar më shumë dëshirë për fitoren.
Skuadra durrsake goditi traversën me Maçollin dhe pati edhe një shtyllë. Si dhe humbi një rast të pastër me Arifin, duke treguar kontroll të plotë në pjesën e dytë. Goli i fitores erdhi në minutën e 87-të. Maçolli shënoi nga penalltia dhe vendosi ndeshjen.
Me këtë rezultat, Tirana rikthehet në zonën e ftohtë të tabelës, aty ku ka kaluar pjesën më të madhe të sezonit. Ndërkohë, Teuta ndodhet vetëm 3 pikë larg Dinamos, skuadrës që mban vendin e katërt.
Dobi: “Fitorja ndaj Tiranës na jep qetësi, fokus te Flamurtari”
Trajneri i Teutës, Enkelejd Dobi, u shfaq i kënaqur pas fitores 0-1 ndaj Tiranës, duke theksuar se objektivi i radhës është triumfi me Flamurtarin. Ai vlerësoi interpretimin e lojtarëve, veçanërisht pjesën e dytë, ku Arifi bëri një paraqitje të jashtëzakonshme, dhe shprehu pakënaqësi për rastin e vetëm që i la Tiranës. Dobi theksoi rëndësinë e qëndrueshmërisë dhe agresivitetit në lojë, si dhe besimin që drejtuesit i dhanë ekipit. Sipas tij, puna dhe disiplinimi japin kënaqësi, ndërsa skuadra ka mbajtur strukturat dhe ka qenë konsistente. Ai vuri në dukje se ndeshja mund të ishte mbyllur me një rezultat më të lartë, por penalltia solli fitoren e merituar. Trajneri paralajmëroi për kujdes dhe këmbëngulje në ndeshjen e ardhshme, duke ruajtur fokusin për sezonin.
[video width="666" height="360" mp4="https://cdnimpuls.com/lapsi.al/wp-content/uploads/2026/02/699b10479c83a.mp4"][/video]
