Prestianni, Vinicius u ngatërrua: “Thashë ‘hermano’ e jo ‘mono’ (vëlla jo majmun)”

Fakti që mbuloi gojën para se t’i thoshte diçka Vinicius, në momentet e nxehta që pasuan golin e Real Madrid në fushën e Benfica-s në ndeshjen e parë të playoff-it të Champions League, nga njëra anë duket si “fakti” që do ta fuste në faj Gianluca Prestianni (çfarë nevoje do të kishte ta bënte, nëse jo për të fyer brazilianin?), nga ana tjetër është pikërisht gjëja që me shumë gjasë do ta shpëtojë 20-vjeçarin argjentinas nga sanksionet e UEFA-s, e cila ndërkohë ka hapur një hetim zyrtar mbi episodin. Të provohet jo vetëm se fjalët që lojtari i Benfica-s ka artikuluar ishin fyerje, por edhe se ato ishin me përmbajtje raciste (gjë që natyrisht e shumëfishon rëndësinë), duket e pamundur, pikërisht sepse nuk shihet goja e Prestianni dhe për rrjedhojë nuk mund të lexohet nga lëvizja e buzëve. Për më tepër, edhe në prani të leximit të buzëve, nëse mungon audioja mbështetëse, mbetemi gjithmonë në fushën e interpretimeve, me pasojë që nuk mund të ketë kurrë siguri, gjë që e bën shumë të vështirë një dënim.

Momento del homólogo del jugador del Benfica llamando "Mono" a Vini #HalaMadridYNadaMas pic.twitter.com/Hl97SjJxFO

— Guru_RM15 (@Guruisla_RM15) February 18, 2026

Ajo që mbetet në procesverbal nga mbrëmja shumë e tensionuar në stadiumin “Da Luz” është reagimi i menjëhershëm i Vinicius kur dëgjon ato fjalë pranë tij, vrapimi i tij drejt arbitrit Letexier dhe aktivizimi i protokollit kundër racizmit nga ana e gjyqtarit me gjestin e krahëve të kryqëzuar. Dhe më pas, Mbappé që i bërtet vazhdimisht Prestianni “je një racist i mallkuar”, duke e theksuar edhe më shumë në pasndeshje, kur tha se argjentinasi nuk është i denjë të luajë në Champions dhe aq më pak të konsiderohet koleg i tij në futbollin profesionist.

Mbappe to Prestianni “You are a f**king racist” “You are a f**king racist” pic.twitter.com/VuN1sA4mce

— WolfRMFC (@WolfRMFC) February 17, 2026

Versioni i Prestianni: “I thashë hermano Vinicius”

Edhe francezi pra e ka dëgjuar frazën raciste që Vinicius e ka denoncuar menjëherë te arbitri: “Më quajti majmun”. Fjala “majmun” në spanjishten e folur në Argjentinë është “mono”, diçka që tingëllon ngjashëm me “hermano”, që do të thotë “vëlla”, dhe që Prestianni në ato momente ka këmbëngulur se e ka thënë duke iu drejtuar Letexier-it (aty nuk e ka gojën të mbuluar dhe lëvizja e buzëve është shumë e qartë).

Pero dice Prestianni que le dijo “hermano”. Por ello necesitaba cubrirse la boca y con esa “mirada de amistad”. pic.twitter.com/RVILA5GxdF

— Rodolfo Landeros ?? (@RodolfoLanderos) February 17, 2026

Një version që Prestianni – i mbështetur nga Benfica – e ka përsëritur pas ndeshjes në disa postime në profilet e tij në Instagram dhe X. “Dua të sqaroj se në asnjë moment nuk kam drejtuar fyerje raciste ndaj lojtarit Vinicius Junior, i cili për fat të keq ka keqinterpretuar atë që beson se ka dëgjuar. Nuk kam qenë kurrë racist ndaj askujt dhe më vjen keq për kërcënimet që kam marrë nga lojtarë të Real Madrid”, ishte mesazhi i parë në një “story” në Instagram.

Postimi i argjentinasit

Më pas argjentinasi shtoi diçka tjetër në dy postime në X: “Nëse kaq shumë njerëz thonë se kam bërë një koment racist ndaj Vinicius Junior, pse asnjë lojtar i Real Madrid nuk reagoi? Të akuzosh dikë për diçka të rëndë nuk është e drejtë, sidomos kur nuk është e vërtetë. Dhe të gjithë më drejtojnë gishtin sepse mbuloj fytyrën me fanellë, kur e dinë që të gjithë futbollistët e mbulojnë fytyrën kur flasin. Mos u përpiqni më të shpikni gjëra”.

Si tanto dicen que SUPUESTAMENTE yo dije un comentario racista a vinicius junior por que no reaccionó ninguno ? Acusar de algo grave no está bien y menos cuando no es verdad. https://t.co/tx4c9Cu6Xj

— gianluca (@gianlucaa_11) February 18, 2026

Një histori vërtet e shëmtuar dhe që nuk do të përfundojë këtu, duke parë vëmendjen maksimale të FIFA-s dhe UEFA-s ndaj çështjes së racizmit. Por për të dënuar dikë, në çdo sistem juridik, nevojitet siguria e shkeljes së kryer, edhe pse në këtë rast gjithçka duket se shkon kundër ish-lojtarit të Vélez Sarsfield.