Barazohet ndeshja e prapambetur e javës së 24-t të Serie A mes Milan dhe Comos, sfidë që mbyllet 1-1, duke e çuar kështu “Djallin” në -7 nga Interi kryesues. Kuqezinjtë dhe larjanët ndajnë pikët në “San Siro”, ku mes të ftuarve të mbrëmjes ishte edhe Tom Brady, legjendë e NFL (7 Super Bowl të fituar) dhe tani një nga pronarët minoritarë të Birmingham City (klub i Championship-it anglez).
Fillimi i ndeshjes nuk dhuron emocione të veçanta, por më pas takimi zhbllokohet papritur në minutën e 32': Maignan gabon në ndërtimin me këmbë dhe i lejon Nico Paz të ndërpresë tentativën e tij për pasim drejt Jasharit, me argjentinasin që thjesht duhet ta shtyjë topin në rrjetë për 1-0. Reagimi i “Djallit” është i furishëm dhe mban firmën e Tomori: anglezi lëshon një goditje të mrekullueshme me të djathtën në fluturim mbi krosin e Athekame, por Butez përgjigjet me një pritje stratosferike.
Po Tomori shpëton më pas Milan nga një rrezik potencial në zonën e vet, ndërsa Maignan rikuperohet duke bllokuar përfundimin nga afër të Sergi Roberto. Pavlovic pëson një problem fizik në fundin e pjesës së parë dhe në pushim zëvendësohet nga Allegri (futet Gabbia), ndërsa Nico Paz ndëshkohet me karton të verdhë në fillim të pjesës së dytë: numri dhjetë i Fabregas ishte në rrezik pezullimi dhe do të mungojë në sfidën kundër Juventus.
Lexo më tej:Modric i përjetshëm: goli i tij zgjidh problemet, Milan vendos Inter nën presion
Milan rritet dhe në minutën e 64' barazon me Leao, i zoti për të mposhtur Butez me një parabël shumë të ëmbël: Como befasohet nga një pasim i gjatë i Jasharit, që e gjen portugezin në hapësirë të lirë, i cili nuk gabon përballë portierit kundërshtar. Fofana shpërdoron më pas shansin për të kaluar përpara kuqezinjtë në minutën e 70', përpara se Leao të godasë traversën me kokë: megjithatë ndaj luzitanit sinjalizohet pozicion jashtë loje. Në minutën e 80' përjashtohet Allegri, pas një përplasjeje të ashpër pranë vijës anësore, me vërshëllimën përfundimtare që zyrtarizon 1-1 final.
Milan ngjitet kështu në kuotën e 54 pikëve, duke rrëshqitur në -7 nga Interi kryesues, por duke e çuar të paktën në +8 avantazhin ndaj Juventus, e pesta në renditje, në garën për Champions. Në 42 pikë ngjitet Como, që kalon Atalantën në vendin e gjashtë.
