Teuta ka dalë nga kriza e rezultateve duke gjetur më në fund trepikëshin pas dhjetë ndeshjesh pa fitore. Durrsakët mposhtën 2-1 me përmbysje Bylis në sfidën e javës së 24-t të Superiores, të zhvilluar në stadiumin Niko Dovana. Dy gola në 2 minuta, pastaj vendosi perla nga goditja e dënimit e realizuar nga Blerim Kotobelli, shoqëruar me gishtin drejtuar nga qielli, në kujtim të të atit, që u nda nga jeta tre ditë më parë.
Sfida nisi me “shok” për vendasit, pasi në minutën e 3-të Aurel Marku zhbllokoi shifrat për Bylisin, duke kaluar miqtë në avantazh të hershëm. Reagimi i Teutës ishte i menjëhershëm dhe në minutën e 5-të Wotlai riktheu baraspeshën, duke vendosur rezultatin 1-1.
Në minutën e 44-t, Teuta ishte shumë pranë përmbysjes, por portieri Ozois shpëtoi Bylisin pas goditjes me kokë të Kotobellit. Pjesa e parë u mbyll në barazim 1-1.
Në fraksionin e dytë, durrsakët rritën presionin dhe gjetën golin e avantazhit në minutën e 56-të. Kotobelli realizoi një supergol nga goditja e dënimit, duke dhuruar një moment “magjik” për tifozët vendas.
Deri në fund, Bylisi tentoi të reagojë, por Teuta administroi mirë rezultatin. Pas 90+5 minutash lojë, gjyqtari sinjalizoi fundin e takimit me shifrat 2-1 për durrsakët.
Me këtë sukses, Teuta merr frymë lirisht në garën për mbijetesë. Bylisi mbetet në pozita të vështira dhe me presion të shtuar në javët e ardhshme.
[video width="652" height="360" mp4="https://cdnimpuls.com/lapsi.al/wp-content/uploads/2026/02/6990988d9e656.mp4"][/video] [video width="642" height="360" mp4="https://cdnimpuls.com/lapsi.al/wp-content/uploads/2026/02/699099a034338.mp4"][/video] [video width="656" height="360" mp4="https://cdnimpuls.com/lapsi.al/wp-content/uploads/2026/02/6990a75806ae2.mp4"][/video]
