Irani ka reaguar pas vendimit të BE-së, e cila e shpalli organizatë terroriste Gardën Revolucionare. Kreu i diplomacisë iraniane Abbas Araghci, tha se shteti iranian e ka cilësuar këtë vendim, si një "gabim të madh strategjik".
"Disa vende aktualisht po përpiqen të shmangin shpërthimin e një lufte të plotë në rajonin tonë. Asnjëri prej tyre nuk është evropian. Evropa po ndez zjarrin", shkroi ai në një postim në platformën X.
Në të njëjtën kohë, forcat e armatosura iraniane e cilësuan si të papërgjegjshëm dhe keqdashës, vendimin e 27 vendeve të Bashkimit Evropian për të përfshirë Gardën Revolucionare në listën e organizatave terroriste.
"Vendimi irracional, i papërgjegjshëm dhe keqdashës i BE-së u mor padyshim nga nënshtrimi i verbër ndaj politikave të Shteteve të Bashkuara dhe regjimit sionist", thanë ata në një deklaratë të transmetuar nga agjencia zyrtare e lajmeve IRNA e Iranit.
Mediat e huaja shkruajnë se Këshilli i Ministrave të Jashtëm arriti një marrëveshje politike për përfshirjen e Korpusit të Gardës Revolucionare Islamike të Iranit, në listën e organizatave terroriste të Bashkimit Evropian.
"Me këtë vendim, Garda Revolucionare vendoset në të njëjtën kategori me Shtetin Islamik (Daesh), Hamasin, Hezbollahun dhe al-Kaedën", tha Përfaqësuesja e Lartë e BE-së Kaya Kallas.
Siç theksoi ajo, shtypja e dhunshme e protestave në Iran ka sjellë kosto të rënda njerëzore, duke nënvizuar se ata që veprojnë përmes terrorizmit duhet të trajtohen si terroristë.
Në të njëjtën mënyrë, presidentja e Komisionit Evropian, Ursula von der Leyen, tha se "termi 'terrorist' është me të vërtetë i përshtatshëm për të përshkruar një regjim që shtyp me gjakderdhje protestat e popullit të tij". Me këtë vendim unanim të "27", Bashkimi Evropian u pajtuan edhe vendet e tjera, si Shtetet e Bashkuara, Kanadaja dhe Australia.
