Ministri i Jashtëm italian, Antonio Tajani, ka thirrur ambasadorin e Izraelit në Itali, Jonathan Peled, për të kërkuar sqarime dhe për të përcjellë një protestë të ashpër lidhur me një incident të rëndë që përfshiu dy karabinierë italianë në shërbim pranë Konsullatës së Përgjithshme të Italisë në Jerusalem.
Sipas Ministrisë së Jashtme italiane, dy ushtarakët u ndaluan në territor palestinez, pranë Ramallahut, nga një person i armatosur me rroba civile, i dyshuar si kolon izraelit. Ai i ka kërcënuar me armë automatike dhe i ka detyruar të gjunjëzohen.
Ngjarja ndodhi gjatë një inspektimi përgatitor për një mision të ambasadorëve të Bashkimit Europian në një fshat pranë Ramallahut, në territor të Autoritetit Kombëtar Palestinez. Burime qeveritare italiane bëjnë me dije se karabinierët u mbajtën nën kërcënimin e një pushke mitralozi.
Edhe pse ishin të pajisur me pasaporta dhe karta diplomatike dhe lëviznin me automjet me targa diplomatike, ata u “morën në pyetje” nga personi i armatosur. Duke ndjekur rregullat e angazhimit, karabinierët nuk reaguan me dhunë. Personi u kaloi telefonin dikujt tjetër, i cili pretendoi se zona ishte ushtarake dhe se ata duhej të largoheshin. Megjithatë, pas verifikimit me Cogat-in (komanda ushtarake izraelite për territoret palestineze), u konfirmua se në atë vend nuk ekzistonte asnjë zonë ushtarake.
Dy karabinierët u kthyen të padëmtuar në konsullatë dhe raportuan ngjarjen tek ambasada italiane dhe zinxhiri komandues. Për shkak të seriozitetit të incidentit, ambasadori italian në Tel Aviv ka paraqitur një notë zyrtare proteste ndaj qeverisë izraelite, duke përfshirë Ministrinë e Jashtme, Cogat-in, Shtabin e Përgjithshëm të Forcave të Mbrojtjes së Izraelit, policinë dhe shërbimin sekret Shin Bet.
Farnesina ka bërë të ditur se po shqyrton hapa të tjerë proteste në nivelin më të lartë politik.
