Presidenti i Shteteve të Bashkuara, Donald Trump ka urdhëruar ndërtimin në mënyrë sekrete të një objekti të sigurt nëntokësor në Shtëpinë e Bardhë.
Ishte viti 1941 dhe Franklin D. Roosevelt u nxit të ndërtonte një strehë kundër bombave në krahun lindor të Shtëpisë së Bardhë pas sulmit në Pearl Harbor.
Në atë kohë, “nuk pati asnjë pohim për publikun se po ndërtohej një strehë kundër bombave në krahun lindor”, sipas historianit të Shoqatës Historike të Shtëpisë së Bardhë, Bill Seale.
Më shumë se 80 vjet më vonë, krahu lindor është sërish në ndërtim, në përgatitje për sallën e re të vallëzimit të presidentit Donald Trump, ndërsa objektet historike nëntokësore, ndonëse të vjetruara, janë çmontuar. Dhe, edhe një herë, ekziston një nivel i lartë sekret rreth planeve për rindërtimin e bunkerit.
Dihet shumë pak publikisht për ndërtimin që po zhvillohet në hapësirën që dikur ishte një bunker sekret, i ngjashëm me një nëndetëse, i cili përfshinte Qendrën Presidenciale të Operacioneve të Emergjencës (PEOC) dhe infrastrukturën përreth saj. Kjo hapësirë është përdorur për gjithçka, që nga shikimi i një filmi parodi që administrata Nixon e konsideroi pornografik dhe kërkoi të ndalohej, deri te planifikimi i udhëtimit klandestin të ish-presidentit Joe Biden në Ukrainë. Zëvendëspresidenti i atëhershëm Dick Cheney u evakuua në këtë hapësirë pak çaste para sulmit ndaj Pentagonit më 11 shtator 2001.
Sipas një burimi të CNN, hapësira ka shumë të ngjarë të rikonceptohet dhe të pajiset me teknologji të re për t’u përballur me kërcënimet në të ardhmen.
Gjatë një mbledhjeje të fundit të Komisionit Kombëtar të Planifikimit të Kryeqytetit, ku u diskutua salla e vallëzimit, drejtori i menaxhimit dhe administratës në Shtëpinë e Bardhë, Joshua Fisher, deklaroi në mënyrë të përgjithshme se projekti do të “përmirësojë funksionalitetin kritik të misionit”, “do të realizojë përmirësimet e nevojshme të sigurisë” dhe “do të ofrojë infrastrukturë elastike dhe adaptive, në përputhje me nevojat e ardhshme të misionit”.
Fisher u pyet pse projekti kishte shkelur precedentët duke nisur procesin e prishjes pa miratimin e komisionit, dhe ai shpjegoi se arsyeja ishte puna “tepër sekrete” që po zhvillohej nën tokë.
“Ka disa aspekte të këtij projekti që, sinqerisht, janë të një natyre tepër të klasifikuar dhe mbi të cilat po punojmë aktualisht. Kjo nuk na pengon të ndryshojmë strukturën mbi nivelin tokësor, por kjo punë duhej të merrej në konsideratë gjatë realizimit të projektit, i cili nuk ishte pjesë e procesit të NCPC-së”, tha ai.
Në një padi të paraqitur javën e kaluar në gjykatë, që synonte të ndalonte ndërtimin e krahut lindor, Shtëpia e Bardhë e mbrojti procesin, duke argumentuar se ndalimi i ndërtimit nëntokësor do të “rrezikonte sigurinë kombëtare dhe, për rrjedhojë, do të dëmtonte interesin publik”.
